Një i ri i cili nuk ka automjet, por bëri sherr për një makinë të parkuar gabim, pasi u konfliktua me policët bashkiakë u justifikua para Policisë së Shtetit me kartelën që e justifikon atë me çrregullim personaliteti.
Sipas një burimi shtetasi D. L 38 vjeç nga Mamurrasi i hodhi fletën e gjobës në fytyrë policit bashkiak. Irritimi i tij sipas komisariatit numër 3 kulmoi kur njëri nga efektivët bashkiakë e pyeti “kush jeni ju”, ndërkohë që ai pasi kishte parë grumbullin e policëve bashkiakë u prezantua si pronar i mjetit.
“Mos e gjobit këtë makinë është e imja”, – tha i riu nga Mamurrasi dhe më pas ka zgjatur duart të griste bllokun e policëve. Efektivi E. Baci përshkruan situatën e mëtejshme “më pas më gjuajti me grushte në fytyrë, por aty ndërhyri kolegu L. Haka dhe një qytetar i rastit që e mbajtën për krahësh. Ai zotëria ishte i nxehur dhe kërkonte llogari se përse po e gjobisnim” thotë polici bashkiak. Por grindja nuk ka zgjatur shumë.
Burime të policisë i thanë gazetës Si se pas disa çastesh në rrugën Gjergj Fishta ka mbërritur një tjetër qytetar. Edhe ai është prezantuar si pronari i mjetit duke deklaruar: ma jep gjobën ta paguaj. Pikërisht pas kësaj dëshmie, pronari i rremë është qetësuar. Por konflikti nuk është mbyllur këtu, pasi bashkiakët kanë kërkuar ndërhyrjen e policisë së shtetit.
Të habitur me një pronar që refuzonte gjobën dhe një tjetër që e pagoi, bashkiakët kanë dyshuar për qytetarin rebel se mos kishte ndonjë çështje më te hershme personale.
Për këtë shkak të gjithë janë dërguar në komisariatin numër tre dhe kur janë qetësuar, sipas burimeve dritëhijet i ka sqaruar 38 vjecari. “Unë vuaj nga çrregullimet e personalitetit, kjo është kartela që mbaj që prej 2016 – tha i riu nga Mamurrasi. Nga procesverbali i kartelës së QSUT rezulton që ai të ketë qenë i shtruar në nëntor 2016 me diagnozën çrregullim i personalitetit kufitar, një shkresë që ai e mban me vete sa herë bën sherr me policët.
