Drejtësia ka ndezur dje dritën jeshile për rigjykimin e Izet Haxhisë. Ish-truproja i Sali Berishës ndodhet në qeli për shkak se ndaj tij rëndon një dënim me 25 vite burg si i përfshirë në vrasjen e ish-deputetit Azem Hajdari.
Duke qenë se dënimi tij u dha në mungesë, pas 2 vitesh betejë, dje u vendos që gjithçka të nisë nga zeroja. Prokuroria ka thirrur si dëshmitar Sali Berishën. Por ish-kryeministri pritet të paraqitet për herë të parë në këtë proces, të cilin e ka shmangur prej shumë vitesh. Ndryshe në atë kohë kur gjyqtarët e prokurorët bënin siç thoshte Berisha, tani situata ka ndryshuar.
Falë përcaktimeve në Kodin e Procedurës Penale, nëse Berisha refuzon të shkojë në gjykatë, atëherë do të merret forcërisht nga policia. Gazeta ka siguruar detaje nga dosja hetimore e prokurorisë për vrasjen e Hajdarit dhe sipas të dhënave, Berisha i është shmangur mbi 50 herë thirrjes në gjykata e prokurori.
Nga të dhënat bëhet e ditur se vetë prokuroria gjatë hetimeve e ka thirrur plot 25 herë Sali Berishën të dëshmojë dhe ai në asnjë moment nuk është paraqitur pranë organit të akuzës. Ndërkohë herët e tjera ai është thirrur në të gjitha shkallët e gjyqësorit ku vijoi procesi dhe i refuzoi. Sipas informacioneve bëhet fjalë për mbi 50 fletë thirrje të cilat u hodhën në kosh nga ish-kryeministri.
Por Berisha e shmangu drejtësinë dhe vendosi të rrëfehej te ambasadat. “Unë dëshminë time për vrasjen e Azemit e kam bërë me vullnet të plotë. S’ia kam bërë Arben Rakipit. Ai ishte avokati i krimit në atë kohë. Dëshmia ime i është dhënë ambasadorit amerikan që ai e dorëzoi te Prokuroria. Ishte këmbëngulja jonë te hetimi ndërkombëtar dhe ata erdhën e dënuan disa prej atyre. Të tjerët i eliminuan nga dosja. Vrasësit direkt të Azemit morën ndëshkim, organizatorët nuk ishin në dorën tonë. Unë i thashë të gjitha dhe dija jo pak”, deklaroi Berisha pak kohë më parë.
Ja si ndodhi vrasja e Hajdarit
Ish-deputeti i Partisë Demokratike, Azem Hajdari, u ekzekutua mbrëmjen e 12 shtatorit 1998, pak metra larg selisë së PD-së në kryeqytet. Nga breshëritë e plumbave gjeti vdekjen dhe truproja i tij, Besim Cera nga Dibra. Për vrasjen e ish-liderit të dhjetorit u akuzuan Jaho Mulosmani si dhe tre vëllezërit, Izet, Ismet dhe Isamedin Haxhia, njerëz që qëndronin shumë pranë kryeministrit Berisha.
Prokuroria në atë kohë pretendonte se ish-truproja i kryeministrit Sali Berisha, Izet Haxhia, telefonoi Hajdarin dhe e nxori nga zyra e tij, ku dhjetë minuta më pas e ekzekutuan në pritë, ndonëse një moment i tillë mbetet realisht i paqartë. Në një proces gjyqësor maratonë u cilësuan fajtorë Mulosmani, i cili u dënua përjetë si dhe dy vëllezërit Izet e Ismet Haxhia, që u dënuan përkatësisht me 25 dhe 20 vitet heqje lirie.
I treti i vëllezërve Haxhia, Isamedini u dënua vetëm për armëmbajtje pa leje. Edhe pse dosja u mbyll me ndëshkimin e tre personave, asnjëherë nuk u tha motivi i vërtetë se përse u ekzekutua Azem Hajdari. Gjykata u mjaftua vetëm me faktin se u vra për hakmarrje. Por tashmë gjërat po lëvizin dhe mbetet me interes dëshmia që do të japë Sali Berisha në gjykatë.
