Presidenti Ilir Meta ka shtuar dozën e kërcënimeve ndaj kryeministrit Edi Rama dhe mazhorancës. Në një deklaratë për mediat pas konferencës për HEC-et, Meta ka sulmuar Ramën për reformën zgjedhore.
Meta tha për mediat se, në qoftë së prishet marrëveshja e 5 qershorit faji i vetëm është i Edi Ramës. Sipas tij, Rama po luan me fatin e popullit, por nëse rrezikon marrëveshjen më shumë në rrezik do të vihet fati i tij. Meta i ka bërë thirrje kryeministrit të reflektojë, duke i vënë në dukje se ka vetëm pak kohë për dakordësi më pas do i duhet të mbajë përgjegjësitë i vetëm përpara popullit.
“Nuk do të ketë dy fajtorë në rast se shkelet marrëveshja e 5 qershorit, nuk do të ketë as 4 fajtorë, do të ketë vetëm një fajtor, i cili për fatin e tij personal, kërkon të vërë në pikëpyetje fatin e 4 milionë shqiptarëve. Jo vetëm kaq.
Çështjet shtetërore dhe interesi kombëtar janë të paprekshëm dhe duhet të respektohen njësoj nga të gjithë. Unë mendoj se ka mbetur dhe pak kohë për të reflektuar dhe uroj të ketë reflektim, përndryshe kuptohet se përgjegjësia do të jetë vetëm e një fajtori”, u shpreh presidenti. Sipas tij, punën më të madhe deri tani për marrëveshjen e 5 qershorit e kanë bërë ndërkombëtarët.
Dhe ndërsa i falënderoi këta të fundit, Meta vuri në dukje se edhe opozita ka bërë shumë lëshime ndaj mazhorancës për hir të popullit, ndërsa qeveria vazhdon të veprojë për hesap të vet.
“Për mua si president ka qenë dhe mbetet e rëndësishme respektimi i marrëveshjes së 5 qershorit, për të cilën falënderova dhe ambasadorët për kontributin që ata dhanë dhe unë u përpoqa të jap kontributin tim në drejtim të insistimit që opozita të mos vendoste si kusht qeverinë teknike edhe pse janë të gjitha provat që nga dosja e Shijakut, që nga dosja e Dibrës se kjo qeveri vë dorë mbi zgjedhjet.
Opozita bëri lëshimin shumë të madh duke pranuar të mos vërë një kusht të tillë, me qëllim që të mbyllej kjo marrëveshje”, theksoi Meta.
Meta kërcënon Ramën
Në lidhje me hapjen e listave, kreu i shtetit tha se pret kodifikimin e marrëveshjes së 5 qershorit dhe se duartroket hapjen 100% të tyre. Por ai ka kërcënuar haptazi kryeministrin Edi Rama. “Unë pres vetëm kodifikimin e marrëveshjes së 5 qershorit.
Hapja e listave 100% duartrokitet nga unë në mënyrën më të përzemërt, këtë nuk e bëj thjesht se nuk kandidoj. Unë them mos keni frikë nga vota e qytetarëve dhe nga hapja e listave. Shqipëria nuk ka parlamentarizëm sepse nuk ka debat dhe mbrojtje të të drejtave të qytetarëve, sepse deputetët, jo të gjithë janë kthyer në kukulla të kryetarëve. Unë nuk duhet të merrem me direktivat e brendshme apo publike që jepen në këtë drejtim.
Unë di një gjë, si përfaqësues i unitetit të kombit, nëse dikush përpiqet të barazojë fatin me tij me fatin e gjithë shqiptarëve mua nuk më vjen keq për fatin e tij. Jam këtu për ti shërbyer të ardhmes europiane”, tha kreu i shtetit. Edhe pse ka sulmuar drejtësinë pa fund, Meta deklaroi dje se problemi më i madh sot është kapja e drejtësisë. Sipas tij sot ka politikanë që punojnë kundër interesave të vendit.
“Sot problemi është kapja e drejtësisë nga politika, shkelja e Kushtetutës siç ka ndodhur deri tani. Në mënyrë të njëanshme kanë kaluar ligje në kundërshtim me rekomandimet e Komisionit të Venecias.
Çështja më e rëndësishme është që sot për fat të keq kemi politikanë që punojnë kundër interesit kombëtar të Shqipërisë dhe shqiptarëve. Integrimi Europian është interesi i parë dhe i fundit i shqiptarëve”, tha Meta.
