Partia Socialiste mund të rinisë procedurat për shkarkimin e presidentit Ilir Meta. Ditët e fundit presidenti Meta është zhveshur komplet nga statusi i kreut të shtetit, ndërsa po bën politikë dhe po sulmon fort qeverinë e mazhorancën socialiste.
Por kjo strategji e ndjekur nga Meta është bërë objekt debati në mbledhjen e grupit parlamentar të Partisë Socialiste, e cila u mbajt këtë të hënë.
Deputetët kërkesë Ramës të mos tolerohet Meta
Gazeta ka mësuar detaje të forta nga ky takim, ku deputetët socialistë i kanë kërkuar llogari kreut të Grupit Parlamentar të PS se përse e kanë amnistuar presidentin Meta. Sipas informacioneve, mësohet se disa deputetë janë shfaqur tejet kritikë sa i takon mënyrës se si mazhoranca po sillet përballë Metës, ndërkohë që ja kanë bërë të qartë zotit Balla se ajo që iku, iku tanimë dhe se socialistët duhet t’i tregojnë forcën e tyre kreut të shtetit.
Në këtë kontekst, mësohet se ligjvënësit e Partisë Socialiste i kanë kërkuar numrit 2 të PS që nisur nga fakti që Meta po shkel Kushtetutën e Shqipërisë me të dyja këmbët, për shkak se po bën politikë, në një kohë që ai duhet të jetë figurë e unitetit të kombit, të shikohet mundësi për të rinisur procedurat për ta shkarkuar atë nga detyra.
Mësohet se socialistët janë shprehur me nota kritike që e “falën” kur ngritën komisionin hetimor që hetoi veprimtarinë e presidentit në lidhje me anulimin e zgjedhjeve lokale të 30 qershorit të vitit 2019 dhe se për ta, tani nuk mbanë më ujë pilafi dhe se ka ardhur koha që t’i tregojnë vendin kreut të shtetit.
Por ndërkohë që deputetët socialistë po i kërkonin llogari Ballës, mbledhjes së grupit i është bashkuar nga fundi kryeministri Edi Rama, i cili sipas asaj që theksuan burimet është shprehur se kërkesa e deputetëve të PS është tërësisht legjitime, nisur nga sjelljet e fundit të presidentit Meta.
Në këtë kontekst, mësohet se zoti Rama ka garantuar vartësit e tij se mazhoranca është duke përpiluar ligjin organik të presidentit, ku një risi do të jetë edhe futja e një dispozite që Presidenti i Republikës të mos bëjë dalje dhe deklarata politike.
Kështu që siç thotë burimi pranë selisë rozë, kryeministri Rama është shprehur se do të shikojnë se sa Meta do të zbatojë ligjin e ri, pra ligjin organik dhe se nëse do të shohin që ai do ta shkelë atë, duke bërë politike, nuk përjashtohet edhe rinisja e proceduarave për të shkarkuar Metën nga detyra, pse jo përpara zgjedhjeve parlamentare të 25 prillit të vitit 2021.
Po ashtu, mësohet se shefi i qeverisë është shprehur para deputetëve se ai i qëndron dhe nuk i heq asnjë presje asaj që tha në Parlamentin e Shqipërisë edhe ditën kur raporti i komisionit hetimor shkoi për t’u votuar në seancën plenare, se Ilir Meta nuk e meriton të qëndrojë në atë zyrë dhe karrige, por që në atë rast ai tha se respektoi opinion e Komisionit të Venecias, duke e amnistuar atë nga shkarkimi.
Foto e video mbi takimet e fshehta të Metës
Por sugjerimi dhe kërkesa që i bënë kryeministrit Edi Rama në mbledhjen e grupit të PS dy ditë më parë, nuk është e vetmja çështje e diskutuar.
Burime nga mbledhja i pohuan gazetës se deputetët janë shprehur para shefit të qeverisë se ata kanë dijeni që presidenti Ilir Meta prej 2 javësh ka nisur takimet e fshehta dhe po bën fushatë elektorale, në një kohë që me ligj atij nuk i lejohet të bëjë politikë.
Madje, për të treguar se këto pretendime janë të vërteta, disa deputetët janë shprehur se kanë foto dhe video nga takimet e fshehta të Metës me qytetarët, ku shihet që bën fushatë dhe propagandon duke kërkuar vota për LSI.
Në këtë kontest, mësohet se deputetët socialistë janë shprehur se këto fakte ua kanë çuar vetë qytetarët e zonave të tyre elektorale që kanë qenë prezentë dhe kanë parë që presidenti Meta është zhveshur nga kostumi i kreut të shtetit, duke bërë fushatë edhe duke u marrë hapur me politikë.
Kështu që, nisur nga këto fakte dhe rrethana, deputetët kanë këmbëngulur dhe i kanë kërkuar zotit Rama që të rinisë procedurat për shkarkimin e Metës, pasi sipas tyre, ai nuk e meriton të jetë më Presidenti i shqiptarëve. /Rigels Seliman
