Kryeministri Edi Rama dhe presidenti Ilir Meta duket se do të kenë një betejë shumë të ashpër mes tyre deri më 25 prill. Teksa lideri demokrat është tërhequr dhe ja ka lënë skenën Ramës me Metën, lufta po ashpërsohet nga dita në ditë.
Dje u mblodh Asambleja Kombëtare e PS, ku në fjalimin gati dy orësh, shefi i qeverisë i kushtoi një rëndësi të madhe përplasjes me presidentin. Rama kritikoi ashpër presidentin për dekoratat e dhëna kohët e fundit. Ai u shpreh se do të jetë hera fundit që një president dekoron të vdekurit.
“Është Presidenti i parë dhe i fundit i një republike që jep dekorata për ata që kanë vdekur para se ai të lindte, nuk ka, nuk ekziston. Presidentët nuk japin dekorata për ata që kanë vdekur më parë, për arsye se dekorata është një simbol që të shquan ty ndaj të tjerëve.
Ka medalje për ata që vriten në krye të detyrës sot. Ai është Hero i Popullit, Meta për çfarë e bën mjeshtër të punës Vojo Kushin? Enver Hoxha ka dhënë vetëm një herë dhe e ka dhënë për Selam Musain, ja dha ky prapë. Dhe ajo ka qenë e vetmja shkelje e protokollit”, tha ai. Rama më tej foli dhe për akuzat se dekoratën e Vojo Kushit e mori dikush që nuk kishte lidhje me të.
“Imagjinoni këta në varr se si mund të rrotullohen kur ju vjen zëri që keni një dekoratë për të marrë dhe dekoratën e Vojo Kushit e merr njëri që nuk e njihte as familja. E kanë gjetur te kafja e LSI dhe i kanë thënë hajde të marrësh dekoratën e Vojo Kushit.
O Ilir lëri të rënët, Heroit të Popullit nuk i jepet dekoratë, kështu si e ka nisur do i japi Skënderbeut urdhrin e Nënë Terezës, ku do shkojë, ka marrë varrezat me radhë. Meta mendon që është hero. Kërkon nga bustet, nga të vdekurit, energjinë që i duhet për t’u bërë hero dhe i jep dekorata për t’i marrë me të mirë. Turp”, tha Rama.
Takimi me OFL
Ilir Meta e sfidoi dje kryeministrin që të tregojë se me kë subjekt të OFL është takuar. Rama iu përgjigj nga Amfiteatri i Liqenit të Tiranës ku dhe u mbajt Asambleja, se e ka të sigurt se ai po takohet skutave për të rrëzuar qeverinë.
“Është e sigurt që president në botë as Saliu që ishte president as ka pasur e as nuk do ketë më që dergjet skutave për të bërë fushatë kundër qeverisë dhe kë takon nëpër skuta ai e di vetë, po fakti që futet në skuta, kthesa e mbikalime për të rrëzuar qeverinë në krye të opozitës së bashkuar është krim më vete. E vërteta është ndryshe, ai u bë president me votat e veta dhe të PS.
Nuk i kishim votat për të vënë një president me dëshirën tonë. E kam thënë që po i japim opozitës presidentin më të mirë. Nuk e kam menduar që do të shkonte deri në këtë pikë, sa të shkallonte”, tha Rama.
Rama akuza ndaj LSI
Kryeministri nuk ka kursyer akuzat dhe ndaj LSI. Sipas tij ajo është një parti e shndërruar në kancer dhe kërkon vetëm të shqyejë vendin. “LSI nuk ka lidhje me përgjegjësin qeverisëse. Ajo kërkon të rritet në kurriz të shtetit. Bomba që hodhi në erë koalicionin me LSI ishte reforma në drejtësi.
Aty ndarja u bë e pariparueshme. LSI u krijua për të marrë sa më shumë pushtet duke marrë peng njërin nga dy të mëdhenjtë. Ka përfituar nga degradimi i PS. Ka përfituar nga një boshllëk i krijuar nga PS. Ka përfituar nga pakënaqësia e krijuar brenda PS ku shumë njerëz ndjeheshin të papromovuar sa duhet dhe është rritur në kurriz të PS dhe PD. LSI është një organizatë e krijuar vetëm për këtë parim.
Njësoj si qelizat es kancerit të cilat thuhet se rriten pa qëllim dhe shtohen vetëm për të vdekur organizmin që kanë. Me LSI nuk ka mundësi të bëhet më shumë se çfarë bëmë në mandatin e parë. Unë nuk i heq presje atyre që kam thënë. Kam qenë partizan, dy herë, i bashkimit me LSI dhe falë atij koalicioni, për shkak të numrave kemi bërë shumë gjëra. Edhe Luli nuk i do, por nuk di si ti heqë. Ku hiqen ata, ne e dimë se ç’hoqëm”, tha Rama.
