Ilir Meta duket se nuk po i ecin planet për të rikthyer koalicionet parazgjedhore. Partia Socialiste është e vendosur për të hequr koalicionet parazgjedhore dhe madje ka qenë vetë kryeministri Edi Rama, i cili ka paralajmëruar se sapo presidenti Meta të kthejë mbrapsht Kodin e ri Zgjedhor, mazhoranca do ta rrëzojë dekretin dhe do ta miratojë ligjin ashtu siç ishte.
Por kjo vendosmëri e socialistëve për të hequr koalicionet parazgjedhore ka “tërbuar” kreun e shtetit, i cili ka nisur kërcënimet ndaj Ramës. Përmes një statusi në rrjetet sociale, dje zoti Meta ka bërë thirrje për revolucion, ndërsa ka publikuar disa vargje të Migjenit, për të cilin shprehet se është një uragan i përhershëm.
Nëpërmjet tyre, kreu i shtetit paralajmëron kryeministrin Edi Rama se është gati grushti i fuqishëm i revoltës popullore. Madje, ai theksoi më tej se qeveria Rama i ka vendosur të ardhmes europiane të vendit një “mal që s’bëzanë”, i cili është ngritur mbi korrupsionin dhe nëpërkëmbjen e vlerave kombëtare.
“Vargjet e poetit tonë kombëtar, Migjeni, janë një uragan i përhershëm frymëzimi dhe kushtrimi, që burojnë nga dhimbjet dhe vuajtjet e njerëzve të thjeshtë, të cilët nuk e durojnë dot shtypjen dhe padrejtësinë.
Ato simbolizojnë grushtin e fuqishëm të revoltës mbarëpopullore në çdo kohë, kundër së keqes, mjerimit, padrejtësisë, shfrytëzimit, dhunës, korrupsionit, arrogancës dhe mashtrimit politik. Sot, në 109-vjetorin e lindjes së Migjenit, vargjet e tij vijnë më aktuale se kurrë.
Të ardhmes europiane të vendit, i është vendosur para një “Mal që s’bëzanë” sterrë i zi, i ngritur mbi shkatërrimin e shtetit dhe dinjitetit njerëzor, mbi korrupsionin e llahtarshëm dhe përdhosjen e çdo vlere kombëtare”, shkruan ai.
PS e vendosur për të rrëzuar dekretin dhe fundosur LSI
Por vendosmëria e PS për të rrëzuar dekretin, i cili i hapë rrugë heqjes së koalicioneve parazgjedhore, duke fundosur kështu LSI-në, nuk po kapërdihet dot nga presidenti Ilir Meta që çdo ditë lëshon kërcënimet dhe paralajmërim ndaj Ramës.
Pra, në kushtet kur ky i fundit i ka kërkuar Metës që ose t’i firmosë ose t’i kthejë sa më shpejt ndryshimet në Kodin Zgjedhor, pasi në këtë mënyrë do të nisë sa më shpejt zbatimi i tyre nga Komisioni Qendror i Zgjedhjeve. Kështu që edhe presidenti Meta e ka nuhatur këtë rrezik dhe ka nisur që t’i kërkojë Ramës që të lejojë koalicionet parazgjedhore, duke e kërcënuar.
Ndërkohë po ditën e djeshme përmes një statusi në rrjetet sociale, presidenti Meta sulmoi kryeministrin Edi Rama, ndërsa i kujtoi se 3 milionë shqiptarë janë gati ta rrëzojnë atë, të cilin e quajti Esatin e Rilindjes në zgjedhjet parlamentare të 25 prillit të vitit 2021.
“Esati i Rilindjes, armiku më i egër i socialistëve idealistë, guxoi sot të fyejë edhe simbolin e tyre dhe të Partisë Socialiste, trëndafilin e kuq si gjaku, që prej kohësh e ka zëvendësuar me gjethen e kanabisit dhe barin e egër të Rilindjes, që rritet në llumin e oligarkisë dhe bandave.
Esati i Rilindjes duhet ta ketë të qartë se numërimi mbrapsht për të dhes sektin pa nder, pa vlera e pa atdhe që përfaqëson, ka filluar dhe nuk do ndalet! Tre milionë ilirë në 25 prill i ka gati! Dhe nuk më thua, o trendi buburrec, kur do dalësh në përballje me mua? Mezi po të pres”, nënvizoi presidenti Ilir Meta. /Rigels Seliman
