Kuvendi hedh sot piketat për bazën e Kuçovës. Ditën e sotme Komisioni i Sigurisë Kombëtare do të diskutojë projektligjin “Për Ratifikimin e marrëveshjes për mbështetje teknike, ndërmjet Këshillit të Ministrave të Republikës së Shqipërisë dhe Agjencisë së Mbështetjes dhe Prokurimit të NATO-s, për realizimin e projekteve të Kuçovës, të financuara nga programi i investimeve të NATO-s për sigurinë, vitet 2019-2022”.
Gazeta pak ditë më parë dha detaje nga kjo marrëveshje ndërsa sot komisioni pritet të bëjë miratimin e saj. Marrëveshja vjen në një kohë kur ka nisur një betejë e fortë për Ballkanin. Presidenti Trump arriti një marrëveshje të fortë mes Kosovës e Serbisë, ndërkohë që nga ana tjetër Rusia e Kina kanë shtuar lëvizjet për të ndikuar në Ballkan.
Ndërtimi i bazës në vendin tonë është padyshim një tregim dhëmbësh për rusët dhe kinezët. Nga ana tjetër është dhe një sinjal se amerikanët po marrin në dorë fatet e Shqipërisë. Prej 30 vitesh klasa politike ka bërë çfarë i ka dashur qejfi, por tashmë litari duket se po ngushtohet. SPAK dhe BKH janë në dorë të SHBA. Nga ana tjetër NATO do të vijë te ne. Kjo do të thotë se politika nuk do mendojë dot më vetëm për të mbushur xhepat.
Investimet e amerikanëve
Shtetet e Bashkuara të Amerikës do të investojnë në bazën e Kuçovës miliona dollarë. Sipas parashikimeve amerikanët do të investojnë fillimisht 41.317.000 euro. Sipas draftit, 100 mijë euro do të përdoren për restaurimin e kullës së kontrollit. 8.545.000 euro do të shkojnë për sigurimi i mjediseve për depozitimin dhe furnizimin me karburant për avionët. 2,000,000 euro do të përdoren për sigurimin e mjediseve për municionin. 672,000 euro për sigurimin e qendrës kundër avarive dhe zjarrit dhe 30.000.000 euro për restaurimin e pistës.
“Kjo marrëveshje ka për qëllim investimin nga NATO për implementimin e programit, i cili do të mundësojë modernizimin e bazës ajrore Kuçovë dhe kthimin e saj në një bazë ajrore taktike (TACAIR) të NATO-s. Rëndësia që ka ky projekt për vendin tonë vjen si pasojë se investimi është i gjithi me fondet e NATO-s, investim ky që mbart një vlerë prej afërsisht 50.000.000 eurosh.
Ky investim dhe projekt janë të parët në llojin e vet që bëhen për vendin tonë. Investimi nga NATO për realizimin e projektit do të sjellë një rivitalizimin dhe modernizimin e bazës ajrore të Kuçovës, si dhe kthimin e saj në një bazë ajrore taktike (TACAIR) të NATO-s, dhe vënien në përdorim të saj për NATO-n, duke qenë dhe një investim strategjik i NATO-s për Ballkanin”, thuhet në relacionin e marrëveshjes.
Në formatin e saj, kjo marrëveshje është një model standard i përdorur nga Agjencia për Mbështetje dhe Prokurime të NATO-s (NSPA), për implementimin e projekteve të saj. Në të parashikohen mënyrat e implementimit të projektit, si dhe detyrimet që do të kenë palët nënshkruese të kësaj marrëveshjeje.
Afatet
Në dokument janë dhënë dhe fatet se kur do të jetë gati pista në fjalë. Sa i takon kullës së kontrollit, puna do jetë e ndarë në disa faza, por në nëntor të 2022 ajo do të jetë gati. Sigurimi i mjediseve për depozitimin dhe furnizimin me karburant për avionët dhe sigurimi i mjediseve për municionin do të mbyllen në nëntor 2023. Sigurimi i qendrës kundër avarive dhe zjarrit parashikohet të jetë gati në nëntor 2022. Ndërsa pista do të jetë gati në nëntor të 2023. Pra në fund të vitit 2023 mund të nisin normalisht fluturimet nga baza e Kuçovës.
