Byroja Kombëtare e Hetimit po punon fort në prapaskenë për të nisur sa më shpejt luftën ndaj korrupsionit. Edhe pse armiqtë e reformës kanë nisur sulmet ditët e fundit, në të vërtetë në hije drejtoresha Aida Hajnaj dhe prokurorët e SPAK janë duke punuar për ta bërë sa më shpejt funksionale Byronë Hetimore.
Pak ditë më parë Hajnaj firmosi një marrëveshje me Drejtorinë e Tatimeve për të luftuar pastrimin e parave, ndërsa gazeta ka mësuar se kanë nisur konsultat dhe me ndërkombëtarët sa i takon luftës kundër krimit të organizuar dhe korrupsionit. Një ndër organizatat e para ndërkombëtare që do të asistojë BKH është EUROPOL.
Misioni Pameca ka mundësuar një bashkëbisedim mes Aida Hajnajt dhe përfaqësuesve të EUROPOL për të hedhur piketat e bashkëpunimit. Në takim morën pjesë Z. Jari Liukku, Shefi i ESOCC, Z. Roberto Garbini, Specialist i Projekteve Analitike (AP Copper) dhe Drejtues të përfaqësive të vendeve të BE dhe Palëve të Treta pjesë e AP Copper.
“Kjo video Konferencë shërbeu për të diskutuar në lidhje me bashkëpunimin e ardhshëm midis dy organizatave në luftën kundër krimit të organizuar dhe korrupsionit, të cilat nuk mund të shihen si dy fenomene të pavarura, siç u tha nga pjesëmarrësit.
Z. Liukku theksoi se është e rëndësishme të sigurohet një bashkëpunim aktiv, ndërsa ai ftoi Drejtorin e BKH të konsideronte EUROPOL-in si një burim informacioni në lidhje me vendet anëtare të BE.
Znj. Hajnaj vlerësoi fjalët e Z. Liukku dhe theksoi se karakteri ndërkombëtar i krimit në ditët e sotme kërkon bashkëpunim dhe angazhim midis partnerëve. Ajo përmendi që operacionet e ndërsjella dhe ekipet e përbashkëta të hetimit, si dhe shkëmbimi i informacionit mund të jenë thelbësore në luftën kundër krimit të organizuar”, njoftoi PAMECA.
Drejtoresha e BKH gjithashtu bëri një prezantim për përfaqësuesit e EUROPOL dhe për përfaqësitë e vendeve të BE dhe Palëve të Treta pjesë e AP Copper mbi rolin, fushat e kompetencës dhe kuadrin ligjore të BKH, në lidhje me luftën kundër krimit të organizuar, korrupsionin dhe pritshmëritë në të ardhmen.
Pastrimi i parave
Krimi i organizuar dhe korrupsioni janë dy veprat kryesore që do të jenë në kompetencën e SPAK dhe BKH. Por lëvizjet e ditëve të fundit të BKH tregojnë se po shkojmë drejt shembullit kroat dhe atij rumun. Kur u krijuan organet antikorrupsion në këto shtete, gjëja e parë që bënë ishte arritja e një marrëveshje me organizatat ndërkombëtare si Eurojust, Europol, FATF, Rrjeti Gjyqësor Europian, DEA, etj.
Edhe BKH po ndjek të njëjtën rrugë. Arsyeja që në Rumani e Kroaci u arritën këto marrëveshje është për të gjurmuar paratë e krimit apo korrupsionit. Shumë bosë krimi dhe pushtetarë paratë i nxjerrin jashtë. Falë këtyre agjencive do jetë shumë e lehtë të gjurmohen. EUROPOL është policia e BE, por që shtrihet dhe në vende jashtë eurozonës. Pritet që falë saj BKH të ketë akses në shumë vende të BE për të marrë të dhëna për krimin e organizuar dhe llogaritë e fshehta bankare. Nuk duhet harruar se disa politikanë shqiptarë i kanë fshehur paratë në Zvicër, Qipro dhe Londër. Ngritja e BKH duket se do të jetë një kambanë alarmi për ta./Kliti Topalli
