Dosja “Hajdari” duket se ka vendosur në vështirësi të madhe prokurorët e gjyqtarët përballë ish-kryeministrit Sali Berisha. Izet Haxhia ka nisur një betejë për të rrëzuar dënimin ndaj tij, ndërsa akuzon drejtpërdrejt Sali Berishën si të përfshirë në vrasjen e Hajdarit.
Por edhe pse ai ka disa vite që kërkon përballjen me Berishën, duket se kjo gjë po has pengesa të mëdha. Të hënën u shty gjyqi ndaj tij pasi prokurori ishte me temperaturë. Seanca e radhës është lënë për sot në mesditë. Por kjo seancë duket se do i vendosë kapak gjithçkaje, pasi sot duhet të merret vendimi nëse Sali Berisha do të jetë dëshmitar apo jo në proces.
Gazeta e tha pak ditë më parë se po luftohet fort që Berisha të mos marrë pjesë dhe nëse seanca e sotme dështon, atëherë duket se po lëvizin shumë gurë në prapaskenë. Nuk është çudi që dikush nga pjesëmarrësit në proces të dalë me Covid, megjithatë mbetet të shihet se si do të shkojë seanca. Prokuroria ka thirrur 10 vetë si dëshmitarë, ndërsa pala mbrojtëse 20. Si prokuroria ashtu dhe Izet Haxhia kanë disa emra të përbashkët dhe mes tyre është Sali Berisha. Ky i fundit ka dhënë një deklaratë për ambasadën amerikane ku akuzon personat tashmë të dënuar. Për këtë dëshmi ai është thirrur që të japë detaje.
Një tjetër lëvizje që ka shtyrë palët të kërkojnë dëshminë e tij është ajo e takimit me Zenel Nezën. Ky i fundit ishte truproja i Azem Hajdarit dhe mbeti i plagosur. Por personi i parë që i shkoi në spital ishte Sali Berisha. Ky i fundit shoqërohej nga gazetari Ylli Rakipi dhe me një diktofon në dorë ata regjistruan fjalët e para të Nezës. Ky i fundit iku jashtë vendit dhe mori azil, por konsiderohet si i vetmi që e di se kush qëlloi ndaj Hajdarit.
Shmangia e drejtësisë
Gazeta ka siguruar detaje nga dosja hetimore e prokurorisë për vrasjen e Hajdarit dhe sipas të dhënave, Berisha i është shmangur mbi 50 herë thirrjes në gjykata e prokurori. Nga të dhënat bëhet e ditur se vetë prokuroria gjatë hetimeve e ka thirrur plot 25 herë Sali Berishën të dëshmojë dhe ai në asnjë moment nuk është paraqitur pranë organit të akuzës.
Ndërkohë herët e tjera ai është thirrur në të gjitha shkallët e gjyqësorit ku vijoi procesi dhe i refuzoi. Sipas informacioneve bëhet fjalë për mbi 50 fletë thirrje të cilat u hodhën në kosh nga ish-kryeministri. Por Berisha e shmangu drejtësinë dhe vendosi të rrëfehej te ambasadat. “Unë dëshminë time për vrasjen e Azemit e kam bërë me vullnet të plotë. S’ia kam bërë Arben Rakipit.
Ai ishte avokati i krimit në atë kohë. Dëshmia ime i është dhënë ambasadorit amerikan që ai e dorëzoi te Prokuroria. Ishte këmbëngulja jonë te hetimi ndërkombëtar dhe ata erdhën e dënuan disa prej atyre. Të tjerët i eliminuan nga dosja. Vrasësit direkt të Azemit morën ndëshkim, organizatorët nuk ishin në dorën tonë. Unë dhashë të gjitha dhe dija jo pak”, deklaroi Berisha pak kohë më parë.
Ja si ndodhi vrasja e Hajdarit
Ish-deputeti i Partisë Demokratike, Azem Hajdari, u ekzekutua mbrëmjen e 12 shtatorit 1998, pak metra larg selisë së PD-së në kryeqytet. Nga breshëritë e plumbave gjeti vdekjen dhe truproja i tij, Besim Cera nga Dibra. Për vrasjen e ish-liderit të dhjetorit u akuzuan Jaho Mulosmani si dhe tre vëllezërit, Izet, Ismet dhe Isamedin Haxhia, njerëz që qëndronin shumë pranë kryeministrit Berisha.
Prokuroria në atë kohë pretendonte se ish-truproja i kryeministrit Sali Berisha, Izet Haxhia, telefonoi Hajdarin dhe e nxori nga zyra e tij, ku dhjetë minuta më pas e ekzekutuan në pritë, ndonëse një moment i tillë mbetet realisht i paqartë. Në një proces gjyqësor maratonë u cilësuan fajtorë Mulosmani, i cili u dënua përjetë si dhe dy vëllezërit Izet e Ismet Haxhia, që u dënuan përkatësisht me 25 dhe 20 vite heqje lirie. I treti i vëllezërve Haxhia, Isamedini u dënua vetëm për armëmbajtje pa leje.
Edhe pse dosja u mbyll me ndëshkimin e tre personave, asnjëherë nuk u tha motivi i vërtetë se përse u ekzekutua Azem Hajdari. Gjykata u mjaftua vetëm me faktin se u vra për hakmarrje. Por tashmë gjërat po lëvizin dhe mbetet me interes dëshmia që do të japë Sali Berisha në gjykatë. /Kliti Topalli
