Profesori Përparim Kabo bëri një tablo të përgjithshme të sistemit të drejtësisë në vendit tonë, ndërthurur me etikën dhe moralin politik.
Ai tha se Reforma në Drejtësi duhet të ishte bërë për të ndëshkuar personat e korruptuar, madje shtoi se ky proces duhet të kishte mbaruar para zgjedhjeve të 25 prillit.
Ai tha se fëmijët e politikanëve e të pasurve, të cilët ikin për të studiuar jashtë, gjëja e parë që mësojnë është etika dhe morali. Për këtë arsye, sipas profesorit, kur rikthehen, “nuk duan të shikojnë me sy prindërit e tyre”, të cilët i kanë shkolluar me para të pista.
“Unë mendoj që Reforma në Drejtësi do të prodhojë vetëm pastrimin, ndryshimi i drejtësisë do të vijë kur të shikojmë që ata që do të rizgjidhen do të jenë si ata që ikën apo do të jenë ndryshe.
Ky është problem i madh sepse mund të iki një palë dhe vjen një palë siç ka ndodhur në politikë. Por pastrimi dhe ndëshkimi i tyre siç ka kërkuar administrata amerikane është një shembull. Një filozof thotë që frika është përgjigja politike e të gjitha kohërave.
Pra pa ndëshkimin politik nuk mund të lindë frika për të mos e bërë nesër atë gjë, por për të bërë atë që duhet. Kultura pandëshkueshmërisht i ka bërë këto trima edhe para betejës, edhe gjatë betejës dhe mbas betejës. Në këtë kuptim kësaj reforme duhet t’i shkojmë deri në fund.
Por ritmi është i frikshëm, shumë i ulët. Nëse do të vazhdohet kështu me aq sa do të shkojnë në VETING do të duhet 10 vite, kur këta duhet të kishin mbaruar brenda 2020, maksimumi para zgjedhjes së prillit duhet të kishte mbaruar.
Zbulimi i së fundit i njollave të atyre që kanë marrë përsipër të bëjnë gjykimin, është një thikë mbas shpine që i është vendosur kësaj reforme. Përse kaq të djallëzuar ne shqiptarët me fatin tonë!
Ç’është ky mllef i brendshëm për të vrarë veten. Në një sistem drejtësie të besueshëm përfitojnë të gjithë, edhe fëmijët e atyre pasuroreve përfitojnë që ata i çojnë për t’i shkolluar në shkollat më të mira jashtë. Gjëja e parë që ata mësojnë ç’është morali.
Ata kur vijnë këtu të parët njerëz që nuk duan t’i shikojnë me sy janë prindërit e tyre. Kjo është një krizë e brendshme”, tha Kabo.
Profesori u ndal edhe tek çështjet ligjore e etike. Për ta rregulluar një shoqëri sipas profesor Kabos nuk mjafton vetëm morali, por nevojitet dhe një strukturë ndëshkuese e cila vjen si rezultat i ligjit.
“Të gjithë filozofët më të mëdhenj kanë studiuar një raport tejet të rëndësishëm dhe delikat raportin e moralit dhe ligjit. Ne kemi një çështje etike me ligjin apo kemi një çështje ligjore mbi etikën.
Jo, ne nuk kemi një çështje etike me ligjin. Ata që gabojnë me ligjin nuk nisen nga principe të gabuara morale, ata nisen nga interesa tregu, nga një mentalitet i vjetër Haxhi Qamilist, grabit, kap çfarë të kapësh, vidh, pasurohu ti të varfërohet vëllai jot, le të vdesë pjesa tjetër e popullsisë, le të mos ketë ushqim ajo.
Kjo nuk është çështje morali, është një paganizëm tregu, i tmerrshëm, i llahtarshëm. Ta rregullosh shoqërinë edhe në mënyrë morale, vetëm nga morali nuk mjafton.
Prandaj lindi shteti, prandaj duhet ndëshkimi ligjor, prandaj sistemi i drejtësisë është zembereku i mekanizmit të shtetit, pa drejtësi nuk ndryshon asgjë.
Magjistrati i jep drejtësinë që i intereson të gjithë shoqërisë, njeriu i zotit në qiell apo në tempull merret me edukimin moral të njeriut”, përfundoi profesori.(Tch)
