Duke reaguar pas raportimit të situatës së kultivimit të kanabisit në Shqipëri gjatë 2020, sipas të cilit, kultivimi i kanabisit pësoi rritje për të dytin vit radhazi, Ilir Meta thotë se rritja është ‘koncesion’ për grupet kriminale.
Përmes një postimi në “Facebook”, Meta thekson se ky është një fenomen që përsëritet sa herë që vijnë zgjedhjet në vendin tonë.
Sipas tij, lufta ndaj drogës është kusht për integrimin evropian të vendit.
“Asnjë surprizë! Shtimi i kultivimit të kanabisit, me afrimin e zgjedhjeve, është kthyer tashmë në traditë.
Është një “koncension” për grupet kriminale, që në këmbim të përfitimeve kolosale nga kanabisi, u kërkohet nga ortakët në pushtet “kontrolli elektoral” i Qarqeve.
Që prej publikimit të raportit të fundit vjetor të Qendrës Europiane të Drogave, i kam bërë thirrje Policisë së Shtetit, Shërbimit Informativ Shtetëror, Prokurorisë dhe agjencive ligjzbatuese të përqëndrohen seriozisht në luftën kundër këtij fenomeni kanceroz, që aq shumë e ka dëmtuar shoqërinë tonë dhe imazhin ndërkombëtar të Shqipërisë.
Lufta kundër drogës është kusht për integrimin europian. Askush të mos mendojë, lëre më të guxojë, që me paratë e kanabisit, të deformojë vullnetin e shqiptarëve në 25 prill 2021 dhe të pengojë të ardhmen europiane të shqiptarëve. Grupet kriminale dhe ortakët e tyre në pushtet janë të identifikuar!” – shkruan Meta.
Ilir Meta i di mirë këto punë në fakt, se prej vitesh eksponentë të partisë së tij, akuzohen si të lidhur me trafikun e drogës.
