Lëvizja Socialiste për Integrim duket se ka marrë tatëpjetën. Ashtu siç gazeta në mënyrë të përsëritur ka deklaruar se qëllimi i socialistëve dhe sidomos kryeministrit Edi Rama është që të rikthejë militantët e LSI në Partinë Socialiste, efektet e këtij plani duket se po jepen nga dita në ditë.
Sinjali më i freskët vjen nga Tirana, aty ku dy ditë më parë është shkërmoqur dega e Lëvizjes Socialiste për Integrim të njësisë numër 2. Më konkretisht, kreu i kësaj njësie, zoti Elez Gjoza ka kaluar tek PS. Zoti Gjoza ka qenë ish-administratori i njësisë nr 2, ndërkohë që është bërë pjesë e socialistëve me një firmë që e anëtarësoi zyrtarisht në Partinë Socialiste. Njësia nr 2 në Tiranë ka patur rezultatin më të lartë të Lëvizjes Socialiste për Integrim në kryeqytet, por me këtë lëvizje tronditet seriozisht, pasi shkërmoqet.
Shkrihen 5 degë në Tiranë dhe disa të tjera në rrethe
Por shkrirja e degës së Lëvizjes Socialiste për Integrim në njësinë numër 2 në Tiranë nuk është e vetmja, pasi kohët e fundit janë shkërmoqur, duke u shkrirë edhe katër degë të tjera në kryeqytet dhe disa në rrethe. Kështu shkrihet dega e njësisë 2, pas LSI në Farkë, në Vaqarr, në njësinë nr. 3 dhe në njësinë nr 11 në Laprakë.
Kjo do të thotë se kur ka mbetur fare pak kohë deri në zgjedhjet parlamentare të 25 prillit, dy njësitë e Lëvizjes Socialiste për Integrim që janë më të forta, 11 dhe 2 janë shpërbërë totalisht. Ndërkohë gazeta ka mësuar se janë shkërmoqur edhe disa degë të partisë së Kryemadhit edhe në rrethe. Mirëpo kjo nuk është e vetmja goditje që po merr LSI, pasi kësaj partie i ka nisur hemorragjia edhe në nivel anëtarësish dhe militantësh. Gazeta ka mësuar se në qytetet si Kolonja, Leskoviku, Libohova, Përmeti, Tepelena, Këlcyra, Gjirokastra, Vlora dhe Saranda është përfshirë nga një eksod i madh, ku shumë anëtarë të partisë së presidentit Ilir Meta kanë janë larguar nga kjo parti, duke iu bashkuar Partisë Socialiste.
Mirëpo, burimet thanë se në ditët e ardhshme do të ketë edhe largime të tjera, ku pritet që PS-së t’i bashkohen edhe të tjetër anëtarë të LSI edhe në qytete të tjera të vendit. Madje, mësohet se partinë e Kryemadhit, pritet ta braktisin edhe disa nga ish-deputetët e saj, të cilët pritet të kandidojnë nën siglën e Partisë Socialiste në zgjedhjet e 25 prillit. Megjithatë, eksodet e sipërpërmendura nuk janë i vetmi tregues, që tregon qartë se pas daljes në opozitë të Lëvizjes Socialiste për Integrim, kjo forcë politike nga dita në ditë po “shkatërrohet” dhe tkurret.
Sidoqoftë, fati i LSI-së do të vendoset në zgjedhjet parlamentare të 25 prillit të vitit 2021, pasi deri atëherë kjo parti me shumë gjasa do të rrudhet akoma më shumë. Gjithsesi mbetet për t’u parë se çfarë do të ndodhë me Lëvizjen Socialiste për Integrim.
Lëvizjet e PS
Po si po i josh PS militantët e LSI? Kështu për shfarosjen e Lëvizjes Socialiste për Integrim nga arena politike, Partia Socialiste ka menduar që të aplikojë disa mënyra, kryesisht duke i marrë militantët nga partia. Më konkretisht, pas porosive të vazhdueshme të kryeministrit Edi Rama, baza socialiste ka nisur “gjuetinë” në kërkim të militantëve të zhgënjyer apo jo të LSI.
Mësohet se një nga taktikat që socialistët do të përdorin kundrejt militantëve të LSI është se do t’i ftojnë në Partinë Socialiste duke iu kujtuar që në fillim kanë qenë socialistë. Ndërsa një tjetër taktikë që socialistët do të ndjekin për të joshur militantë, është se gjatë kontakteve do t’ju kërkohet që të braktisin LSI, për vetë faktin se kjo parti është një forcë pazaresh dhe jo subjekt politik i qytetarëve. Ndërkohë që në të njëjtën kohë, mësohet se socialistët gjatë takimeve me militantët do t’ju kërkojnë këtyre të fundit që t’i bashkohen PS pasi LSI nuk do të vijë më në pushtet./Rigels Seliman
