Deputeti i Partisë Socialiste, Ervin Bushati ka komentuar dje situatën politike në vend, ndërsa shprehet i bindur se PS është e vetmja forcë politike që punon për Shqipërinë.
Gjatë një prononcimi për mediat, zoti Bushati në cilësinë edhe të kreut të Partisë Socialiste të Tiranës zbuloi se PS do të rifreskojë listën e kandidatëve për deputetë që do të garojnë për zgjedhjet parlamentare të 25 prillit, ku një pjesë e tyre sipas tij, do të vijnë nga emrat që janë përzgjedhur nga aplikimet te portali “Deputeti që duam”.
“Gjithmonë PS është rinovuar, ka pranuar elementin e ri. E kemi treguar në çdo parlament që është rinovuar me elementë të rinj. Duke qenë në pushtet edhe në të gjitha bashkitë kemi mundësinë të bëjmë ekipin me të mirë të mundshëm. Në këtë drejtim presim kandidatë të rinj. Na kanë kontaktuar edhe nga diaspora. Ka pasur lloj-lloj aplikimesh. Po i përzgjedhim tani.
Janë gati mbi 150-200 aplikime që vlejnë”, deklaroi ai. Ndërkohë duke folur si kryetar i PS së Tiranës, deputeti Ervin Bushati u shpreh besimplotë se në kryeqytet pritet një fitore e madhe në zgjedhjet e 25 prillit, ndërsa theksoi se në gjithë Shqipërinë mazhoranca synon 74 mandate. “E ndjej dyfish përgjegjësi të them që në Tiranë ne do të përpiqemi të kapim maksimumin. Si qark ka 36 deputetë.
Puna e PS shikohet më mirë në Tiranë. Ne gjithnjë e kemi pasur mbështetjen në Tiranë. Sfida jonë është fitorja bindshëm dhe prej kohësh punojmë me të gjitha strukturat çdo ditë. Ne synojmë 74 deputetë minimalisht në të gjithë vendin edhe në zgjedhjet e këtij viti. E sigurt është që PS do të rikonfirmojë që është forca e parë politike. Si në 2017 kur vendosëm standardin që një forcë politike fiton e vetme e bëjmë edhe në zgjedhjet e ardhshme, duke marrë një mandat tjetër pune”, u shpreh ai.
Nga ana tjetër, Bushati theksoi se viti 2021 do të jetë viti i kthesës ekonomike, pas pasojave të rënda që la tërmeti dhe pandemia. Sipas tij, falë buxhetit të miratuar pritet të ketë rritje ekonomike të ndjeshme. “2021 do të ketë një rritje ekonomike të ndjeshme, do të jetë një vit i kthesës ekonomike. Shqipëria mendoj se do të ketë një vit 2021 shumë më të suksesshëm. Sot asnjë njeri nuk është pa shtëpi, të gjithë e kanë një ndihmë. Kanë filluar ndërtimet në të gjithë rrethet e prekura. Patjetër që ne nuk mund të parashikonim që përveç sfidës së rindërtimit do të ndodhte edhe gjithë ky bllokim për shkak të pandemisë”, nënvizoi Bushati.
