Politika shqiptare ka thyer sytë nga Uashingtoni. Pas inaugurimit të Joe Biden si president nuk ngeli politikan në Shqipëri pa shprehur mbështetjen tij për të, duke filluar nga presidenti, ish-kryeministri Berisha, kreu i opozitës, kreu i Kuvendit, kryetarja e LSI, deputetë të PS, etj.
SHBA ka ndikim të jashtëzakonshëm në politikës shqiptare. Ish-ambasadori Aleksandër Arvizu pasi deklaroi se Basha është yll në ngjitje, ky i fundit u bë kryetar bashkie. Ndërkohë falë tyre janë shmangur shumë konflikte e përplasje. Duke qenë se jemi para zgjedhjeve të gjithë po duken si pro amerikanë.
Nëse kthehemi pas, dikur si PS, ashtu dhe PD me LSI shpenzonin mijëra dollarë për foto me presidentët Obama, Trump dhe funksionarë të tjerë. Duke qenë se këtë herë ka pasur kufizime për shkak të Covid-19, të gjithë janë mjaftuar me mesazhe në rrjetet sociale. Shpresat janë se me ardhjen e Biden do të ketë ndryshime me reformën në drejtësi, por ishte ambasadorja Yuri Kim, e cila ka shuar shpresat e të gjithëve. Dje ajo ka reaguar në rrjetet sociale sa u takon listave për kandidatë, ndërsa ka publikuar dhe një mesazh të kandidatit për Sekretar Shteti, duke e bërë të qartë se dhe nga administrata e Biden fokus do të jetë lufta ndaj korrupsionit.
“Nëse doni të dini nëse ky paralajmërim mbetet i vlefshëm, Tony Blinken, kandidati i Presidentit Biden për Sekretar i Shtetit, tha në seancën e tij të 19 janarit përpara Senatit: “Ne duam të ngremë edhe më lart punën në luftën ndaj korrupsionit””, tha ajo në Twitter. Pra mesazhi i ambasadores është shumë i qartë, pasi edhe pse ka ndryshuar qeveria amerikane, lufta ndaj korrupsionit do të mbetet prioritet, për të mos thënë se do të bëhet më e fortë.
Reforma në drejtësi
Reforma në drejtësi është një reformë që po udhëhiqet nga amerikanët. Të shumtë janë ata që nuk e duan reformën dhe madje është lobuar shumë kundër saj. Yuri Kim që kur u zgjodh nga Trump e bëri të qartë se reforma nuk negociohet. Shpresat ishin se pas ikjes së Donald Lu do të vinte një ambasador që do rrëzonte reformën. Ndodhi e kundërta. Kim është një mbështetëse shumë më e flaktë se Lu.
Pas kësaj sytë u kthyen nga Uashingtoni me shpresën se ndryshimi pushtetit do sjellë ndryshime dhe në Shqipëri. Por Kim e bëri të qartë dje se administrata e re e ka prioritet luftën antikorrupsion. Element tjetër që harrohet është se reforma në drejtësi nisi kur Joe Biden ishte zëvendëspresident. Ishte administrata e Obamës ajo që financoi reformën dhe rikthimi i Biden është një sinjal se do të ketë më shumë mbështetje.
Të frikësuarit
Sot të gjithë janë shfaqur si të gëzuar që Biden u bë president, por nëse kthehemi pas, presidenti Ilir Meta ka shpenzuar mijëra dollar për të marrë pjesë në inaugurimin e Trump 4 vite më parë. Meta ishte i vetmi nga Shqipëria që mori pjesë në Capitol Hill në janarin e 2017. Në këtë vit LSI arriti një marrëveshje me kompaninë lobuese “McKeon Group”, për t’i siguruar liderit të saj në atë kohë, Ilir Meta një ftesë në inaugurimin e presidentit të SHBA-së, Donald Trump. Shpresat e PD-LSI në atë kohë ishin se me ardhje e Trump do binte reforma në drejtësi, por nuk ndodhi asgjë e tillë.
