Një rekord kokaine është kapur tre ditë më parë në Madrid të Spanjës dhe bashkë me të është goditur një bandë e fuqishme e mafias shqiptare.
Kokaina e ardhur nga Kolumbia, pritej në aeroportin e Madridit nga Dy shqiptarët Julian Deblini dhe Dritan Gradica u kapën teksa po prisnin në aeroportin e këtij qyteti, sasinë e madhe të drogës të ardhur nga Kolumbia.
Por sot një radio spanjolle “Caracol” ka publikuar të tjera detaje nga raporti i Interpol për mafien shqiptare që vepron në Evropë dhe që janë të lidhur me kartelet e drogës në Amerikën Latine.
Sipas këtij raporti, bëhet fjalë për një rrjet të madh të shqiptarëve, të cilët sjellin drogë nga Kolumbia në Evropë përmes Spanjës, që shërben si portë hyrëse në kontinentin e vjetër.
Sipas raportit të Interpol, shumë anëtarë të këtij rrjeti njihen për brutalitetin dhe efektivitetin e tyre.
Gjithashtu radio jep të dhëna të tjera rreth këtij rrjeti mafioz shqiptarësh dhe se si anëtarët e tij e fitojnë respektin e pjesëtarëve të tjerë.
Në raportin e publikuar thuhet:
Ky rrjet kriminal që vjen nga vendet e Evropës Lindore karakterizohet nga mënyra e tyre e punës, që njihet për besnikërinë e anëtarëve. Besnikërinë e tyre ata e menaxhojnë duke kontrolluar familjet e tyre në Shqipëri përmes pagesave ndaj tyre, por edhe duke i marrë peng, dhe në këtë mënyrë ata zgjerojnë lidhjet e tyre dhe shtrijnë tentakulat në të gjithë Evropën. Personat që i përkasin rrethit të besimit të kësaj organizate, hyjnë vetëm duke dhënë prova për besnikërinë e tyre tek eprorët përgjatë disa viteve. Anëtarët e këtij rrjeti kriminal janë tepër të rrezikshëm dhe kanë në pronësi disa kompani “security”, të cilat i përdorin për pastrim parash.”
Pas arrestimit të dy shqiptarëve në Spanjë, hetimet janë shtrirë edhe në Shqipëri.
