Partia Demokratike dhe Partia Socialiste kanë njoftuar se nesër do të hapin zyrtarisht fushatën për zgjedhjet parlamentare të 25 prillit.
Hapja e fushatës do të bëhet në sheshin “Nënë Tereza” në orën 17:00 për demokratët, ndërsa socialistët kanë zgjedhur orën 18:00 dhe sheshin “Skënderbej”. Nënkryetari i LSI-së Petrit Vasili e quan këtë lajm të pabesueshëm.
“Kur kam parë lajmin që nesër do të ketë një miting PS-ja, natyrshëm që konsultova disa burime në media, dhe jam pa fjalë. Komiteti nuk është shprehur, ju shihni që sot kanë qenë vetëm 700 gjoba, dhe ende nuk është marrë një vendim, atëherë Edi Rama i merr vendimet për pandeminë?
Pra qytetarët që janë gjobitur sot, nesër nuk do të gjobiten, pse mbaron pandemia nesër. Kjo është makabre, ju e dini që 9 mijë vdekje janë fshehur nga qeveria, që janë qartësisht të lidhura me Covid. Ky ishte fakti përfundimtar që tregon se pandemia ka qenë e trajtuar vetëm për lojëra politike.
Nuk mund të lihej asnjë miting sot në rast se Komiteti nuk ka dalë dhe të jetë shprehur për lirimin e masave. Vetë Komiteti na tha disa ditë më parë që në vendin tonë ka hyrë varianti britanik, që qarkullon me shpejtësi më të madhe”, tha Vasili për Fax News.
