Ish-kryeministri Sali Berisha do të vijojë të mbetet jashtë procesit gjyqësor të Izet Haxhisë. Edhe pse cilësohet si një ndër personat kyç të vrasjes së Azem Hajdarit dhe Izet Haxhia ka kërkuar gjithmonë ballafaqim me të, kjo do të jetë e vështirë.
Sikundër e paralajmëroi gazeta pak ditë më parë, Berisha nuk do të jetë dëshmitar në këtë proces. Dje u mbajt seanca e radhës ndaj Izet Haxhisë dhe prokuroria kërkoi që të thirrej dëshmitar Sali Berisha, si person që ka dijeni mbi ngjarje. Kjo pasi ai ka dhënë një dëshmi në ambasadën amerikane në atë kohë. Por trupa gjykuese ka deklaruar se dëshmia e tij nuk është e nevojshme.
Berisha në disa studio televizive ka dërguar mesazhe të vazhdueshme drejt gjykatës që të mos e thërrasë dhe si duket mesazhet e tij janë marrë. Elementi tjetër është se gjykata nuk siguron dot dëshminë e personave që kanë dijeni mbi ngjarjen. Prokuroria ka kërkuar dëshminë e Zenel Nezës, personi që ishte prezent kur ndodhi vrasja. Neza ishte truprojë e Azem Hajdarit dhe mbeti i plagosur.
Ai ka marrë azil jashtë vendit dhe gjykata në argumentet e saj shprehet se nuk siguron dot adresën për ta njoftuar që të bëhet pjesë e procesit. Gjyqi i Izet Haxhisë shihej si një lëvizje për të rihapur dosjen “Hajdari”, por nga zhvillimet e deritanishme duket proces shumë i vështirë. Dëshmitarët kyç janë lënë jashtë, pasi përveç Berishës janë refuzuar dhe dëshmitë e Fatos Klosit apo të familjes Haklaj.
Lëvizjet e Berishës
Përveç prokurorisë, Berisha është thirrur si dëshmitar edhe nga Izet Haxhia. Pas ngjarjes, Sali Berisha dha një deklaratë në ambasadën amerikane pas vrasjes së Hajdarit dhe për këtë arsye u kërkua dëshmia e tij në gjykatë. Sipas avokatit të Haxhisë, kjo përbën element që ai të thirret në gjykatë.
“Në fashikullin e gjykimit, në faqet 707-708-709-710 ndodhet Deklarata e Partisë Demokratike e firmosur në datën 16 korrik 1999 nga dëshmitari Sali Berisha dhe i ngarkuari me Punë në Ambasadën e SHBA në Tiranë, Robert H. Frowik. Në këtë deklaratë Sali Berisha jep me hollësi gjithë versionin e ngjarjes, orën e saktë të ndodhjes së krimit, si e ka dëgjuar atë, kush ishin qëlluar, nga kush u qëlluan, me kë ishte takuar Azem Hajdari para se të shkonte në vendin e krimit etj etj, shpjegime të hollësishme të kësaj dite ngjarje dhe të ditëve të tjera para dhe pas saj. Deklarimet e Berishës para Gjykatës janë të domosdoshme.
Ai nuk ka qënë i pranishëm në vend ngjarje, por është personi i parë që i ka shkuar i gjithë informacioni për ngjarjen nga dëshmitarët okular, të cilat ai i ka bërë pjesë të deklaratës së tij”, thuhet në kërkesën e Izet Haxhisë.
Informimi nga mbesa
Në dokumentin e palës mbrojtëse, thuhet se Berisha është informuar që para atentatit se mund të ndodhte diçka para selisë së PD. Sipas Idajet Beqirit, ka qenë mbesa e tij që e ka informuar se jashtë selisë ishin Jaho Mulosmani dhe Fatmir Haklaj.
“Mbesa e Sali Berishës Shpresa Breçani te lokali pranë PD i Guxim Biberaj. Ajo i pa Jaho Mulosmanin, Fatmir Haklaj dhe Nazmi Candu afro një orë para ngjarjes. I njihte shumë mirë ata dhe ka shkuar në zyrën e Sali Berishës dhe në prani të dëshmitarit Fisnik Sina dhe të ndjerës Linda Ihsani, e ka vënë në dijeni se kush ishin brenda në autoveturën me targa VL0676.
Sali Berisha duhet të jap versionin e tij se përse në një situatë të tillë, kur u njoftua nga mbesa e tij, në vend që të njoftonte organet e policisë së shtetit, Ministrin e Brendshëm, Presidentin e Republikës etj, urdhëroi Azem Hajdarin që të shkonte te kjo autoveturë dhe të merrej vesh me ta”, thuhet më tej.
