Kryetari i Partisë Demokratike, Lulzim Basha ka spostuar ish-kryeministrin Sali Berisha nga fushata zgjedhore e zgjedhjeve parlamentare të 25 prillit.
Të enjten e 25 marsit, kur u çel zyrtarisht fushata e PD, ish-kryeministri Berisha nuk u hap në mitingun e demokratëve në sheshin “Nënë Tereza”, ndërsa kjo mungesë u aludua si një masë që lideri demokrat të mos ekspozohej në turmë nga frika e koronavirusit apo kishte zëra se ai ishte sëmurë.
Por gazeta ka mësuar detaje se si qëndron e vërteta dhe përse Sali Berisha nuk u shfaq në fushatën e Partisë Demokratike dhe madje edhe sot që flasim, ai nuk është dukur gjëkundi, ndonëse është kandidat për deputet në Qarkun e Tiranës.
Kërkesë nga kompania izraelite
Kështu burime të sigurta nga selia blu i pohuan gazetës se kompania izraelitet që po menaxhon fushatën e PD dhe ka hartuar strategjinë e zgjedhjeve të 25 prillit, ka bërë disa sondazhe ditët e fundit, ku në fokus kryesor ka qenë pikërisht mendimi që kanë qytetarët për Partinë Demokratike dhe se çfarë shkon apo nuk shkon tek kjo parti që duhet përmirësuar. Sipas informacioneve, mësohet se kjo kompani gjatë anketimit ka hasur në një pakënaqësi që publiku ka për ish-kryeministrin, i cili kërkon që zoti Berisha të mos jetë në PD.
Gazeta e ka deklaruar se ndërkombëtarët ia kishin bërë të qartë kryedemokratit Basha që të mos e kandidonte ish-liderin demokrat si deputet në zgjedhjet e 25 prillit. Por Basha nuk mundi që ta merrte këtë vendim të fortë për të lanë jashtë listave ish-kreun demokrat dhe për t’i ardhur në ndihë atij, është futur në lojë kompania izraelite, në mënyrë që prania e Berishës në fushatë të mos i prishë punë Partisë Demokratike.
Mësohet se në kushtet kur nga sondazhet Berisha shihet nga publiku si i padëshiruar, Basha ka marrë masa, duke e spostuar atë nga fushata. Madje, sikundër pohuan të njëjtat burime, mësohet se Berishës i është kërkuar që të rrallojë edhe daljet në media dhe deklarata e forta, porosi kjo që forcon imazhin e PD para qytetarëve dhe pse jo ndikon edhe në shtimin e votave. Pra, në kushte kur ish-kryeministri Berisha shihet si i padëshiruar nga publiku, shefi i selisë blu po përdor si justifikim kërkesën e kompanisë izraelite që merret me PR-in e fushatës zgjedhore të Partisë Demokratike, për të spostuar atë.
Kjo do të thotë se Basha po i bindet kompanisë, e cila e konsideron ish-kryeministrin si njeri të gabuar dhe njeri që i humb votat PD-së, në rast se shfaqet shpesh në fushatë dhe media deri të dielën e 25 prillit kur qytetarët shqiptarë t’iu drejtohen kutive të votimit, për të përfituar kredo politike dhe simpatinë e qytetarëve. Nga ana tjetër, duket se e njëjta skemë u ndoq edhe me Lëvizjen Socialiste për Integrim, parti kjo e cila nuk ishte e pranishme në lejen e fushatës zgjedhore të Partisë Demokratike pasditen e 25 marsit.
Mësohet se partia e Kryemadhit është lënë qëllimisht jashtë kësaj ceremonie me paramendim dhe për shkak se nga sondazhet e bëra nga kompania izraelite, LSI shihej si e padëshiruar nga qytetarët njësoj si Berisha. Kështu që, në kushtet kur Basha ka më shumë nevojë se kurrë për vota, ai po merr kësisoj masash për të fituar zemrat e qytetarëve shqiptarë, në mënyrë që këtë të fundit ta votojnë në 25 prill./Rigels Seliman
