Kreu i Komisionit Qendror të Zgjedhjeve, Ilirjan Celibashi ka zbardhur dje procedurat e votimit për zgjedhjet e 25 prillit.
Në konferencën e zhvilluar Celibashi bëri me dije se fleta e votimit në zgjedhjet e 25 prillit do të jetë ndryshe nga fleta e votimit që është përdorur në zgjedhjet e mëparshme që janë zhvilluar në vend. Pas vendimit të Kolegjit Zgjedhor kandidatët në fletën e votimit do të jenë të identifikuar me numra dhe jo me emra dhe fleta e votimit do të ketë përmasa të njëjta në të 12 qarqet.
Duke qenë se në fletën e votimit do të jetë emri i partisë dhe më poshtë do të jenë të renditur numrat e kandidatëve të asaj partie, atëherë të gjithë votuesit duhet që të jenë të qartë se çfarë numri ka kandidati i partisë për të cilën do të votojnë.
Por, për t’u ardhur në ndihmë votuesve në çdo qendër votimi do të afishohen në mure postera të mëdhenj si edhe fletë palosje me qëllim informimin e çdo qytetari për numrin që i korrespondon çdo kandidati të partisë në të cilën ai bën pjesë. Sa i përket vlefshmërisë së votës, Celibashi bëri me dije se vota do të jetë e vlefshme në momentin kur votuesi do të zgjedhë vetëm partinë ose koalicionin dhe vetëm një kandidat të kësaj partie ose koalicioni dhe nuk mund të zgjedhë një parti apo një koalicion dhe kandidatin e një partie apo koalicioni tjetër.
Pra zgjedhja që votuesi duhet të bëjë duhet që të jetë vetëm brenda partisë. Ndërkohë, vota do të quhet e pavlefshme atëherë kur ajo shkon për një parti ose koalicion dhe kandidati është i një partie apo koalicioni tjetër. Gjithashtu nuk lejohet as të votohet për 2 kandidatë njëkohësisht apo për 2 parti të ndryshme pasi edhe në këtë rast vota do të quhet e pavlefshme. Po ashtu, votuesit kanë të drejtën që të zgjedhin vetëm kandidatin ose vetëm partinë. Megjithatë, duhet pasur parasysh që kur votohet vetëm kandidati, atëherë kjo votë automatikisht i shkon edhe partisë me të cilën ai garon.
“Një votues mund të zgjedhë partinë ose koalicionin dhe vetëm një kandidatë të kësaj partie ose koalicioni, dhe nuk mund të zgjedh një parti apo një koalicion dhe kandidatin e një partie apo koalicioni tjetër, në çdo rast zgjedhja do të jetë brenda partisë. Votuesi mund të zgjedhë vetëm partinë ose koalicioni, nëse nuk do të zgjedh kandidatin, edhe kjo është e vlefshme. E vlefshme është edhe nëse zgjedhë vetëm një kandidat edhe pse nuk e ke zgjedhur partinë ose koalicionit. Vota është e pavlefshme kur zgjedhë 2 kandidatë apo 2 parti”, tha Celibashi.
Celibashi thirrje partive politike
Kreu i Komisionit Qendror të Zgjedhjeve, Ilirjan Celibashi pati edhe një thirrje për të gjitha partitë politike që të bëjnë fushatë të qetë e të ndershme pasi të gjitha palët e përfshira janë në monitorim. Ai theksoi po ashtu se qytetarët të lejohen që të zgjedhin cilën parti që ata dëshirojnë. Celibashi bëri me dije se çdo person, i cili nuk do të respektojë Kodin Zgjedhor do të ndëshkohet.
“Kjo thirrje vlen për partitë politike, kandidatët. Çfarë vlen për të korrigjuar, duhet ta bëjmë me qëllim që këto zgjedhje jo vetëm të jenë më të mira se zgjedhjet e shkuara, por në përputhje me standardet. Jemi të gjithë të vëzhguar, në fund të ditës, për secilin nga ne do të ketë gjykim. Përgjegjësit për mospërmbushjen e Kodin Zgjedhor, do e mbajë përgjegjësinë dhe do të paraqitet në sanksionet përkatëse. Bëj thirrje partive politike dhe kandidatëve të bëjnë një fushatë të qetë dhe të lejohen qytetarët të zgjedhin kë të dëshirojnë”, tha Celibashi.
