Ambasada e Shteteve të Bashkuara të Amerikës në Shqipëri ka dërguar në Prokurorinë e Përgjithshme dosjen për deputetin, njëherësh kreun e Partisë Social Demokrate, Tom Doshi.
Pak ditë para se partitë politike të dorëzonin në 8 mars listat e kandidatëve për deputetë në Komisionin Qendror të Zgjedhjeve sa u takon zgjedhjeve parlamentare të 25 prillit, ambasadorja e SHBA në Tiranë, Yuri Kim nisi një ofensivë kundër zotit Doshit, duke apeluar që ai dhe persona të tjerë me rekorde kriminale të mos bëhen pjesë e garës zgjedhore.
Vetë Tom Doshi e injoroi kërkesën amerikane dhe kandidoi si i pari në listat e PSD në Tiranë dhe Shkodër, ndërsa një dorë atij ia dha dhe KQZ, pasi dha “OK” për kandidimin e tij në zgjedhjet parlamentare të 25 prillit, megjithatë kërkoi hetim të thelluar.
Por gazeta ka mësuar se dje ambasada amerikane i është përgjigjur Prokurorisë së Tiranës lidhur me informacionet e kërkuara për zotin Doshi, duke vënë në dispozicion të njësisë së Dekriminalizimit informacionet që amerikanët kanë mbi aktivitetet e fushatave elektorale të kreu të Partisë Social Demokrate dhe një pjesë të dosjes së Departamentit të Shtetit, i cili e ka shpallur Doshin person “Non Grata”, pasi i gjithë informacioni i DASH nuk mund të vihet në dispozicion, pasi është e ndaluar nga ligjet amerikane. Po ashtu, të njëjtat burime nga institucioni i akuzës theksuan se për Doshin presim përgjigje edhe nga Interpol, ndërkohë që më pas do të vendoste për të.
Hetim të thelluar edhe për 26 kandidatë të tjerë
Por rasti i Tom Doshit nuk është i vetmi, pasi janë plot edhe 29 kandidatë për deputetë nga disa parti politike, për të cilët njësia e dekriminalizimit pranë Prokurorisë së Përgjithshme ka nisur hetimet për të shkuarën e tyre. Pak ditë më parë gazeta e bëri të ditur se ishin mbyllur verifikimet për 2 kandidatët e parë. Ishte vetë institucioni i akuzës që përmes një njoftimi bëri me dije se janë mbyllur hetimet e thelluara për dy kandidatë të listave të Lëvizjes Socialiste për Integrim dhe Nismës Thurje.
Bëhet fjalë për kandidatin e Nismës “Thurje”, Napolon Laska dhe për kandidatin e LSI, Artur Baku. Mirëpo, dje Prokuroria e Përgjithshme ka përfunduar verifikimet e thelluara për një tjetër kandidat që garon në zgjedhjet e 25 prillit. Në shkresën e publikuar edhe nga Komisioni Qendror i Zgjedhjeve, rezulton se Hila nuk ka kryer ndryshime në gjendjen civile, ashtu siç ishte deklaruar në formular.
Sipas prokurorisë, Hila nuk është dënuar për ndonjë vepër penale nga drejtësia shqiptare dhe rrjedhimisht mund të vijojë garën e tij në zgjedhjet e 25 prillit. Pra, së bashku me Tom Doshi, shkon në 4 numri i kandidatëve për deputet. Ndërkohë nga ana tjetër, gazeta ka mësuar nga burime pranë Prokurorisë së Përgjithshme, se do të vijojnë hetimet e thelluara edhe për 26 kandidatët e tjerë, verifikime këto që mund të zgjasin edhe pas 25 prillit, çdo do të thotë se nëse një emër është subjekt i ligjit të dekriminalizimit, atij do t’i ndërpritet mandati.
Doshi sfidon amerikanët
Megjithatë, pavarësisht hetimeve të prokurorisë dhe kërkesës së amerikanëve, kandidati i PSD, Tom Doshi vijon fushatën elektorale. Nga qyteti i Korçës, zoti Doshi shprehu dje bindjen se partia që ai drejton do të marrë 6 mandate deputetësh në zgjedhjet e 25 prillit.
“Ne të sigurta sot kemi 2 mandate në Shkodër, 3 në Tiranë por pritshmëria është shumë e madhe në Tiranë sepse pritshmëria është tek elektorati gri, që dhe me sondazhe dalim 30%, që nuk janë të bindur se për cilën forcë politike do të votojnë”, deklaroi Doshi. /Rigels Seliman
