Deputetët e Partisë Socialiste kanë shpërthyer në akuza atë forta në adresë të presidentit Ilir Meta, ndërsa kanë paralajmëruar shkaktimin e tij pas zgjedhjeve parlamentare të 25 prillit. Dy ditë më parë teksa ishte në një studio televizive, kryeministri Edi Rama akuzoi presidentin Meta se është kthyer në një personazh qesharak dhe se shumica e dalë pas zgjedhjeve të së dielës, që sipas tij do jetë PS, do të marrë masa drastike ndaj tij.
Por ditën e djeshme një paralajmërim të kësaj natyre e ka dhënë edhe drejtuesi politik i Partisë Socialiste për Qarkun e Vlorës, Damian Gjiknuri. Ky i fundit duke folur në një takim përmbyllës të fushatës elektorale të PS në Sarandë, theksoi se shumica socialiste nuk do ta lejojë që Presidencën ta drejtojë Ilir Meta, pasi këtë gjë e kërkojnë edhe qytetarët shqiptarë.
“Meta po kërkon referendum, le ta kthejmë datën 25 prill në një referendum për Ilir Metën, përmes votimit masiv për Partinë Socialiste. Votë që do të na bëjë të shpëtojmë duke mos u kthyer mbrapsht, votë që do të çlirojë Presidencën nga Ilir Meta që e ka marrë peng dhe po e përdor si kryetar i opozitës, por që nuk e ka burrërinë ta pranojë që është kryetar i opozitës.
Së treti do shpëtojmë edhe Lulin nga Berisha, Monika e Meta, në mënyrë që e Luli të dijë të bëjë opozitë”, deklaroi ai. Kjo do të thotë që Partia Socialiste pas 25 prillit do të nisë procedurat për shkarkimin e Metës si president. Madje, burime nga selia rozë i pohuan gazetës se nëse Meta nuk jep dorëheqjen siç ka premtuar, për shkak se zgjedhjet do t’i fitojë PS, ata do të mbledhin firmat për ta shkarkuar atë nga kreu i shtetit.
Meta po shkel Kushtetutën dhe po nxit kaos
Por në të njëjtën linjë me deputetin Gjiknuri, është edhe kryetarja e Komisionit të Sigurisë Kombëtare, Ermonela Felaj. Kjo e fundit gjatë një prononcimi për gazetën “SOT”, akuzoi presidentin Meta se po nxit dhunë përmes thirrjeve të tij, ndërsa paralajmëroi ndëshkimin e tij. Sipas zonjës Felaj, Meta duhet të japë llogari për thirrjet anti-kushtetuese.
“Presidenti i Republikës së Shqipërisë që ruan edhe ai me pjesën e vet me thirrjen e vet për kaos, ta harrojë se nuk do t’i shpëtojë përgjegjësisë. Meta do japë llogari për këto thirrje. Megjithatë kryefjala jonë në ditët në vijim është që të sigurojmë zgjedhje demokratike dhe të qeta, ku çdo qytetar të marrë pjesë në zgjedhjet e 25 prillit. Po ashtu, thirrja ime është që qytetarët të mos bien pre e provokimeve të PD, LSI dhe presidentit Ilir Meta, të cilët do bëjnë gjithçka për të justifikuar humbjen e padiskutueshme në këto zgjedhje”, deklaroi Felaj për gazetën “SOT”.
Çela: Të arrestohet dhe shkarkohet Ilir Meta
Ndërkohë, deputeti i Partisë Socialiste për Qarkun e Fierit, Bujar Çela gjatë një prononcimi për gazetën “SOT”, kërkoi arrestimin e presidentit Meta për shkak se po bën thirrje antikushtetuese dhe po merret me fushatë elektorale. Sipas tij, Meta gjithashtu duhet të shkarkohet si president nga PS. “Presidenti Ilir Meta duhet të arrestohet në flagrancë për thirrjet vëllavrasëse dhe thirrjet për gjakderdhje.
Ndërsa hapi i dytë është që pas arrestimit, Kuvendi të mblidhet dhe ta shkarkojë Ilir Metën. Ilir Meta nuk është presidenti ynë, por një i lajthitur që është në grahmat e fundit. Meta po luan të gjitha kartat e fundit pasi e di që e ardhmja e tij është burgu, kështu që po përpiqte me të gjitha mënyrat që të bëjë destabilitet. Por nuk ka për t’ia dalë. Ilir Meta është një i çmendur që është i frikësuar nga shkrirja e Lëvizjes Socialiste për Integrim dhe reforma në drejtësi, e sidomos SPAK dhe BKH”, deklaroi deputeti Çela për gazetën “SOT”.
