Shqipëria duket se po hyn në një epokë të re. Ndryshe nga të gjitha vendet e tjera diktatoriale, ne jemi i vetmi vend që tranzicioni ka zgjatur rreth 30 vite.
Por javët e fundit po jepen sinjale se tashmë jemi në fund të këtij tranzicionit. Për 30 vite vendi ka qenë në të njëjtën situatë: na qeverisin të njëjtët individë; në politikë ka emra që prej 30 vitesh nuk janë larguar; korrupsioni ka qenë gjithmonë i pranishëm; drejtësia ka qenë përherë e kapur; pushtetarëve nuk u ka hyrë asgjë në këmbë, etj. Por javët e fundit po jepen sinjale se Shqipëria po ndryshon. Së pari, në Parlament do të ikin një numër i madh deputetësh të vjetër.
Rama largoi Majkon, Kodhelin, Ulqinin dhe shumë socialistë të vjetër. Basha po ashtu e ka rinovuar totalisht PD, pasi ikën emra si Topalli, Patozi, Bode, Imami, Pollo, Strazimiri, Bumçi, etj. Pra Parlamenti sivjet do të jetë me shumë prurje të reja. Lëvizja më e bujshme është te largimi i Metës dhe Berishës. SHBA e shpalli “non grata” ish-kryeministrin duke i dhënë një goditje të fortë.
Edhe pse ai nuk e ka thënë ende nëse do largohet nga Parlamenti, në PD po flitet se deri në shtator do të kemi një dorëheqje. Nëse PD e mban atë deputet do i bjerë e gjithë kauza e dekriminalizimit. Pra me këtë goditje, SHBA duket se e largoi Berishën nga politika aktive.
Meta po ashtu mund të quhet se ka dalë nga politika aktive. Me humbjen e LSI në zgjedhje, ai tashmë nuk do ketë më asnjë rol politik pas largimit nga Presidenca. Edhe nëse nuk shkarkohet, ai vitin që vjen e mbyll mandatin dhe pastaj nuk do jetë as në Parlament dhe as në qeveri. Pra quhet i eliminuar politikisht. Të vetmit që prej 30 vitesh kanë qenë në politikë janë ata dhe me ndihmën e SHBA duket se dolën jashtë loje.
Hetimet
Përveç goditjes së klasës politike nga njëra anë, nga ana tjetër drejtësia ka nisur të veprojë. Prej 30 vitesh drejtësinë e ka marrë ai që ka pasur më shumë parà dhe ministrat, deputetët me funksionarët e lartë nuk janë dënuar kurrë.
Javët e fundit po jepen sinjale se nuk do të ketë më të paprekshëm. Dënimi i ish-kryeprokurorit Adriatik Llalla me 2 vite burg është sinjal i qartë nga SPAK dhe Gjykata e Posaçme se nuk do të ketë tolerim ndaj funksionarëve të shtetit. Nga ana tjetër kemi disa dosje të bujshme që po hapen. Gërdeci u rihap dhe u kërkua gjykimi i Fatmir Mediut. Nëse nis gjykimi ndaj tij pritet largimi nga Parlamenti dhe sërish shkojmë te ideja e largimit të klasës së vjetër politike. Dosja e dytë që po shkon drejt rihapjes është ajo e “21 janarit”.
Strasburgu ka dhënë sinjale të qarta se do shkohet te zbardhja e plotë e saj duke dënuar të gjithë autorët e 4 viktimave. Po ashtu kemi një dosje tjetër të bujshme që pritet të zbardhet, ajo e vrasjes së bankierit Artan Santo. Ky i fundit u vra në mes të ditës në qendër të Tiranës dhe për 7 vite askush nuk guxoi të merrej me të. Por disa policë e prokurorë kurajozë i kanë hapur letrat dhe hetimet kanë nisur. Dyshohet se pas vrasjes së tij fshihet një emër i njohur në politikë dhe nëse kjo dosje zbardhet, do shkundet nga themelet vendi, pasi do vërtetohet se shumë politikanë kanë lidhje me krimin.
Drejtësia e re
Një element tjetër është sistemi i drejtësisë. Të njëjtët gjyqtarë kanë mbajtur për 30 vite peng drejtësinë. Të gjithë qarkullonin nga një gjykatë në tjetrën, ndërsa pasuritë e tyre vetëm rriteshin. Vetingu ka shkarkuar mbi 200 emra dhe të gjithë ata të njohurit kanë ikur. Klani i Berishës dhe Metës sot nuk është në drejtësi. Emra si Zaganjori, Dedja, Llalla etj., kanë ikur nga sistemi.
SPAK nga ana tjetër po dëshmon forcë. Pak ditë më parë u sekuestruan pronat për 3 ish-gjyqtarë dhe pritet të ketë të tjera aksione. Po ashtu kemi disa gjyqtarë të hetuar dhe të dënuar, ndërsa shumë të tjerë po shkarkohen. Për të mos thënë se janë rreth 60 vetë që kanë dhënë dorëheqjen dhe janë emra me pasuri sheikësh. Pra drejtësia është pastruar dhe duket se gjërat po kthehen atje ku duhen. Duhet theksuar se fundi i tranzicionit po vjen falë SHBA, pasi amerikanët falë presioneve të tyre sollën drejtësinë e re dhe po largojnë me dhunë klasën e vjetër politike.
