Dy shqiptarë të mrekullueshëm në një makinë: Shkrimtari ynë më i madh, Ismail Kadare dhe aktori dhe poeti plot finesë Timo Flloko.
Kthehen nga Fieri, pasi shkrimtari është vlerësuar si Qytetar Nderi i Fierit, kur Drejtoresha e Qendrës Kombëtare të Librit, Alda Bardhyli, u sjell në mendje “Re me pantallona” të Majakovskit, përkthyer nga Kadare. E këtu nis recitimi që mund të ndiqni në video.
Shkrimtari i njohur ndërkombëtarisht Kadare është vlerësuar me titullin “Nderi i Bashkisë së Fierit”, me motivacionin: “Për kontributin e jashtëzakonshëm që i ka dhënë ndër vite letërsisë shqipe dhe për promovimin e saj në nivelet më të larta të kulturës botërore”.
Çmimi iu dorëzua në sallë e teatrit nga kryebashkiaku Armando Subashi. Gjeniu i letrave shqiptare foli i emocionuar, teksa rikthehej në qytetin e Fierit pas 30 vitesh, këtë herë si qytetar nderi.
Referatet rreth krijimtarisë dhe karrierës së suksesshme të Kadaresë u përcollën me interpretimin brilant të aktorit të njohur Timo Flloko dhe aktorit të Teatrit “Bylis” Klajdi Marku.
