Ilir Meta mori pjesë këtë të premte në festën fetare të Shën Joan Vladimirit, e cila mbahet në Shijon të Elbasanit. Meta dha edhe një prononcim për mediat nga ku u pyet edhe për çështjen e shkarkimit të tij të nisur nga parlamenti.
Meta u shpreh se nuk ekziston një çështje e tillë. Ai theksoi se ajo me të cilën duhet të merren të gjithë është hetimi i zgjedhjeve të 25 prillit.
“Zoti t’i falë ata që nuk dinë se çfarë të bëjnë. Nuk dëshiroj të flasë në një vend të shenjtë për çështjet që nuk ekzistojnë, aq më tepër kur është konfirmuar gjithçka që presidenti ka thënë edhe para 25 prillit dhe ku u tregua qartë se kuvendi i 2 viteve të fundit është pa opozitë.
Sot, Kuvendi është 3 herë më antikushtetues sesa ka qenë. Nuk kam asnjë shqetësim të tillë. Nëse doni të merreni me një gjë serioze, merruni me hetimin e 25 prillit”, u shpreh Meta.
