Teksa ish-kryeministri Berisha ka premtuar se do të vijojë luftën ndaj sekretarit Blinken, pas pak ditësh dosja e shpalljes “non grata” të tij do të marrë edhe vulën e Kongresit Amerikan.
Sipas nenit 7031(c), çdo tre muaj Sekretari i Shteti dërgon në Kongres një raport dhe listën me të gjithë personat e shpallur të padëshiruar.
“Jo më vonë se 30 ditë pas miratimit të këtij akti dhe çdo 90 ditë deri në 30 shtator 2021, Sekretari i Shtetit do iu paraqesë një raport, duke përfshirë një aneks të klasifikuar nëse është e nevojshme, komiteteve përkatëse të Kongresit dhe Komiteteve të Gjyqësorit ku do të përshkruajë informacionin në lidhje me korrupsionin ose shkeljen e të drejtave të njeriut në lidhje me secilin prej individëve të gjetur të papërshtatshëm”, thuhet në nenin 7031(c).
Nga një verifikim i gazetës rezulton se Sekretari Blinken ka bërë raportimin në Kongres për periudhën janar-mars, ndërsa në korrik ai do të dorëzojë raportin për periudhën prill-qershor. Ish-kryeministri Sali Berisha u shpall i padëshiruar më 19 maj të këtij viti, çka do të thotë se është brenda 3 mujorit që do të raportohet në korrik. Kongresi është i vetmi vend ku Blinken do të dorëzojë provat që ka kundër ish-kryeministrit Berisha.
Ky i fundit pretendon se SHBA nuk ka asnjë provë ndaj tij se është i përfshirë në korrupsion, por vetë DASH në një reagim për gazetën u shpreh se Sekretari ka informacione të besueshme për korrupsionin e tij. Nga ana tjetër edhe sesioni 7031(c) nuk flet për prova, por flet për informacione të besueshme. Pra pavarësisht se ish-kryeministri Berisha po tenton të rezistojë, SHBA po ndjek ndaj tij rrugën që ka ndjekur ndaj gjithë të tjerëve. Janë rreth 170 emra të shpallur non grata dhe të gjithë janë raportuar në Kongres që prej vitit 2018. Të njëjtin fat do të ketë dhe Berisha.
Qëndrimi i DASH
Sekretari Amerikan Antony Blinken, përmes rrjetit Twitter më 19 maj informoi se kishte firmosur shpalljen “non grata” të Berishës dhe të familjes së tij. “Aktet korruptive të ish-presidentit shqiptar Sali Berisha minojnë demokracinë në Shqipëri.
Prandaj unë në mënyrë publike shpall Berishën dhe anëtarët e familjes së tij të ngushtë si të papërshtatshëm për të hyrë në SHBA. Ne qëndrojmë të bashkuar kundra korrupsionit me partnerët tanë në Shqipëri”, tha Blinken. Më pas DASH nxori një deklaratë për shtyp, ku informoi se arsyeja e shpalljes së Berishës “non grata” është se ai përveçse ka pasuruar përmes pushtetit familjen dhe aleatët, po ndërhyn në proceset e drejtësisë për t’i shpëtuar ata nga ndëshkimi.
“Në cilësinë e tij zyrtare, veçanërisht si Kryeministër i Shqipërisë, Berisha ishte i përfshirë në veprime korruptive, të tilla si shpërdorim i fondeve publike dhe ndërhyrje në proceset publike, përfshirë përdorimin e pushtetit për përfitime personale dhe për të pasuruar aleatët e tij politikë dhe anëtarët e familjes së tij në kurriz të besimit të publikut shqiptar në institucionet e tyre qeveritare dhe zyrtarët publikë.
Për më tepër, retorika e tij tregon se ai është i gatshëm të mbrojë veten, anëtarët e familjes së tij dhe aleatët e tij politikë në kurriz të hetimeve të pavarura, përpjekjeve kundër korrupsionit dhe masave të llogaridhënies”, tha DASH.
