Bie në pranga i riu që akuzohet për komandën e grupeve sociale të njohura me nofkën “Balena Blu”. Autoritetet ruse thanë sot për mediat se, i ndaluari kishte krijuar një numër grupesh në një sistem mesazhesh, duke joshur pjesëmarrësit të binin në grackën psikologjike ku kritikoheshin prindërit, familja e miqtë.
“Në to promovohej depresioni, dhuna e mënyra të rrezikshme për të dalë nga situata të jetës”, thuhet në njoftimin e autoriteteve ruse botuar në Komsokolskaya Pravda.
19-vjeçari i prangosur në qytetin rus Yessentuki, në rajonin e Stavropol , është ndaluar si i dyshuar për drejtimin e grupit ku anëtarët joshen të luajnë “lojëra” të rrezikshme e të mbrapshta, e rrjedhimisht të humbasin jetën e tyre.
Sipas hetimeve mësohet se, grupet e vdekjes online shenjëstrojnë fëmijë të dobët. Lidhur me këtë akt një prej grupit të komandove është akuzuar për vrasje të dyfishtë.
Kjo akuzë erdhi pasi trupi i një djali e një vajze u gjetën në të njëjtin stacion treni, vetëm tre ditë pasi ata pasi kishin nisur kontaktet me grupet e ashtuquajtura ‘Balena Blu’ në rrjetet sociale. Sipas autoriteteve ruse, kanë qenë disa fëmijë që kanë njoftuar se, një i dyshuar, i pa prezantuar me emër, po i nxiste fëmijët të merrnin jetën e tyre.
Zbulimi i dy adoloshentëve të vetëvrarë
Mediat ruse bëjnë me dije se, janë mbi 50 fëmijë të identifikuar në këtë joshje. I riu i arrestuar në Stavropol akuzohet si përgjegjës për vdekjet në rajonin e Lipetsk të 14-vjeçares Maria, më 11 qershor, dhe 16-vjeçarit Alexander, tre ditë më vonë, më 14 qershor.
Të dy viktimat u goditën nga treni ekspres në stacionin e Dolgorukovo. Djali ishte ende në motoçikletën e tij kur u vra. Nëse shpallet fajtor i akuzuari pret një dënim nga tetë deri në 20 vjet burg. Ndërsa vajza 14-vjeçare, para se të vdiste kishte regjistruar një video ku e përlotur dhe me maskë thoshte se ishte pjesë e grupit të vdekjes Balena Blu, me qindra anëtarë.
Autoritetet kanë gjetur një video ku vogëlushja Maria thotë: “Po më mbaron koha. Një valë e re po nis, do të ketë shumë viktima. Përhapeni këtë informacion për të ndaluar këtë. Unë luajta, ka dhe 524 të tjerë”, thotë ajo, duke paralajmëruar tragjedi në vazhdim.
