Sali Berisha pritet ta ketë të vështirë për ta çuar Partinë Demokratike drejt protestave dhe manifestimeve kundër mazhorancës socialiste në vjeshtë dhe pas saj.
Në 19 maj të këtij viti Departamentit Amerikan i Shtetit ka shpallur “non grata” Berishën dhe familjen e tij, ndërkohë që ish-kryeministri është vënë në lëvizje, teksa ka filluar t’i fryjë zjarrit të protestave.
Por duket se ish-lideri demokrat ka zero mbështetje për ta çuar vendin drejt trazirave në shtator, pasi deputetët e rinj demokratë të dalë nga zgjedhjet parlamentare të 25 prillit janë në krah të kreut të PD, Lulzim Basha dhe kundër propozimeve të kësaj natyre të artikuluara nga goja e Berishës.
Deputetët e rinj në krah të Bashës
Fillimisht ka qenë, deputeti zgjedhur i Partisë Demokratike, Ervin Salianji, i cili gjatë një prononcimi për mediat zbuloi se PD do të hyjë në shtator në Parlament, ndërsa theksoi se demokratët betejën kundër mazhorancës socialiste do ta zhvillojnë pikërisht në Parlament.
Sipas tij, maskara elektorale e 25 prillit s’mund të diktojë hyrjen ose jo të Partisë Demokratike në Kuvend në fillim të vjeshtës. “Kjo s’ka asnjë dyshim që në shtator do të jemi në Parlament. Do të jemi në çdo front ku bëhet opozitë. Zgjedhjet s’kanë të bëjnë me mandatet e fituara. Zgjedhjet dhe mandatet e marra nga PD me gjithë elementet e masakrës, janë mandate përfaqësimi të drejta.
E gjithë pjesa tjetër, që janë 20-30 që janë prodhuar nga kundërshtimi dhe përdorimi i krimit, këto janë mandate që bëjnë diferencën dhe janë të paligjshme dhe e bëjnë jolegjitime qeverisjen”, deklaroi ai. Po ashtu, zoti Salianji theksoi se Partia Demokratike do të përdorë të gjitha rrugët demokratike për të denoncuar skandalet e qeverisë dhe mbrojtur interesin e qytetarëve, duke rrëzuar kështu planet e Berishës për protesta dhe kaos.
“Do e shohim. Do merremi vetëm me interesin publik. Për të pasur më shumë demokraci dhe rikthim në shinat e saj. Shqipëria po kalon pothuajse në diktaturë dhe regjim. Sot ishte një lajm për zaptimin e AMA-s. Pak më përpara, nuk lejohej që të hynin në Kuvend gazetarët dhe u tërhoqën”, nënvizoi Salianji. Pra, duket qartë që deputetët e rinj janë krah Bashës dhe kundër Berishës.
Reagon Zhupa
Nga ana tjetër, po dje edhe deputetja e zgjedhur e PD, Ina Zhupa zbuloi se Partia Demokratike do të zhvillojë betejën e saj kundër qeverisë në shtator në Parlament. Gjatë një prononcimi për mediat, zonja Zhupa theksoi se demokratët do hyjnë në Kuvend.
“Sot u mbyll një cikël i legjimitetit 2 vjeçar, 2019-2021, e një parlamentarizmi që nuk ishte kushtetuese, sepse funksiononte me 120 deputetë , ndryshe nga ajo që parashikon Kushtetuta. Ata persona që zëvendësuan opozitën aty, në fakt ishin shtojca të qeverisë, votuan gjithçka që donte të kalonte qeveria, nga pronat publike, tek ndryshimet në Kodin Zgjedhor. Sot më në fund mbyllet një Parlament që nuk përfaqësonte qytetarët dhe beteja jonë do vijojë në Parlament në shtator. Do vijojë në të gjitha mënyrat për t’ua kthyer qytetarëve atë që iu takon”, deklaroi Zhupa. /Rigels Seliman
