Merr fund epopeja e zgjedhjeve parlamentare të 25 prillit. Pas shumë debatesh, kundërshtish dhe kontestimesh nga palët “humbëse”, Komisioni Rregullator në Komisionin Qendror të Zgjedhjeve i ka vënë dje kapak përfundimisht procesit zgjedhor të 25 prillit, ndërsa ka certifikuar rezultatin.
Më konkretisht, komisioni ka miratuar në parim rezultatin e saktë dhe shpërndarjen e mandateve për 140 deputetët e ardhshëm. Projekt-vendimi është miratuar me 3 vota pro dhe 2 kundër, duke legjitimuar kështu zgjedhjet e përgjithshme që sapo kaluam.
Në 25 prill, Partia Socialiste ka marrë 74 mandate, PD-AN 59 mandate, LSI 4 mandate dhe PSD 3 mandate. Opozita ka kërkuar që këto zgjedhje të shpallen të pavlefshme dhe ripërsëritjen e tyre, por Kolegji Zgjedhor hodhi poshtë pretendimet e tyre. Ndërkohë, tani më lista e 140 deputetëve që do të hyjnë në Parlamentin e ardhshëm është e plotë, me emra të rinj dhe të vjetër.
Opozita paralajmëron ankimim në Kushtetuese
Por vendimi i Komisioni Rregullator në Komisionin Qendror të Zgjedhjeve për të certifikuar zgjedhjet parlamentare të 25 prillit nuk është pritur mirë nga përfaqësuesit e opozitës në KQZ, të cilët madje kanë paralajmëruar ankimimin e rezultatit përfundimtar të zgjedhjeve parlamentare të 25 prillit në Gjykatën Kushtetuese.
Ndërkohë, anëtarja e Komisionit Rregullator, Helga Vukaj ka përmendur edhe njëherë gjithë problematikat e procesit zgjedhor të 25 prillit. Në mbledhjen e sotme, ajo u shpreh se zgjedhjet nuk ishin të lira dhe se qeveria kishte tejkaluar kompetencat për të shtuar numrin e votave pro tyre në kutitë e votimit. “Ky akt duhet të ishte gjurma finale e suksesit, dëshmi e respektimit të mbajtjes larg të administratës dhe mosndikimit të pushtetit në zgjedhje, në mënyrë që të quhej proces i arrirë.
Akti për veprimtaritë e ndaluara u shpërfill nga administrata, dëshmitarë janë kronikat mediatike, etj. Dua të kujtoj fenomenin e patronazhimit të pakërkuar dhe e theksoj. Ky fenomen u zbulua mediatikisht dhe hyri në histori. Dua të kujtoj abuzimet me fondet publike, lekët e shpërndara në javën e fundit të procesit zgjedhor në Durrës për dëmin e bërë nga tërmeti në 2019.
Pas zgjedhjeve ndihma u ndërpre si me thikë. Dua të kujtoj përdorimin e partisë së pisët. Jemi dëshmitarë për gjithë sa më sipër. Kërkova që t’i drejtoheshim edhe SPAK për kallëzimet, por nuk patëm asnjë përgjigje. Efekti POST nuk ka asnjë vlerë. Kam kërkuar edhe nga e-Albania si ishin servirur të dhënat personale”, deklaroi Vukaj.
Nga ana tjetër, përfaqësuesi ligjor i Partisë Demokratike në KQZ, Ivi Kaso ka kërkuar nga Komisioni Rregullator që të mos miratojë projektvendimin për zgjedhjet parlamentare të 25 prillit. Në fjalën e tij, Kaso theksoi se anëtarët duhet të reagonin me votë kundër, për shkak se procesi kishte pasur parregullsi.
“Nuk jam dakord me faktin që jeni të kushtëzuar në vendimin tuaj. Vlerësoj se duhet të ngriheni në lartësinë e detyrës për vlerësimin e procesit. Është proces që duhet t’i shqetësojë të gjithë, shqiptarë dhe ndërkombëtarë. Qëndrimi juaj nuk duhet të jetë “s’kemi çfarë të bëjmë” dhe të shprehni kontestimin tuaj me votë. Kërkoj që të reflektoni thellë dhe reagoni me votë”, deklaroi Kaso.
