“Sot, PD përfaqëson një forcë që ka një nevojë ulëritëse për të rishpikur vetveten, për t’u rithemeluar, për të gjetur rrugën e duhur për te mendja dhe shpirti i shqiptarit, të reflektojë mbi ato që kanë ndodhur.
Këtë gjë nuk e ka bërë dhe vetëm kështu mund të kthehet në një forcë të parë politike, nga shqiptarët mund të kthejnë syrin dhe zemrën. Është një punë në progres, por mungojnë të dy elementët, edhe puna edhe progresi”.
Kështu e komentoi në A2 Dritan Shano, analist dhe anëtar në Këshillin Kombëtar në PD, situatën në të cilën ndodhet partia më e madhe opozitare në vend.
Më tej, Dritan Shano theksoi se Basha nuk e ka lexuar mesazhin që ka marrë nga shqiptarët për zhvillimet e ndodhura dhe kjo duhet korrigjuar menjëherë.
“Resurset që ka PD brenda radhëve të saj dhe pranë saj, janë të jashtëzakonshme, jo si kuvendi që filloi i jashtëzakonshëm dhe mbaroi tejet i zakonshëm.
Ne nuk jemi në pikën e një alternative serioze të pëlqyer për shqiptarët sepse oferta jonë politike, nga pikëpamja e burimeve njerëzore që propozon, është e njëjtë me atë që ka propozuar Basha që prej ditës së parë, janë po të njëjtit njerëz, saqë është krijuar bindja se sa herë Basha do të fusë dorën në thes do të nxjerrë të njëjtit njerëz.
Kjo ka të bëjë me faktin se ai me këta njerëz ndihet rehat. Mesazhi që PD ka marrë nga qytetarët shqiptarë është: “Zotëri, me këta krushq nuk të japim më nuse”. Këtë mesazh Basha ka refuzuar ta lexojë, aq më tepër të reflektojë. Kjo është një nga gjërat që duhet korrigjuar me shpejtësi”, tha ai.
Sa i përket programit, Shano u shpreh se: “Në vitin 2017, PD kishte një program të mirë, të djathtë. Në 2021, PD kishte një program që shkaktoi konfuzion te shqiptarët”.
