Ashtu siç e kishte paralajmëruar, Prokuroria e Posaçme ka ankimuar vendimin për ish-ministrin e Mbrojtjes, Fatmir Mediu. Gjykata e Posaçme refuzoi nisjen e gjykimit për Mediun sa i takon shpërthimit në Gërdec me argumentin se vendimi ishte i parashkruar dhe se Prokuroria kishte 10 vite kohë që të bënte një kërkesë të tillë.
SPAK nuk e ka pranuar këtë vendim dhe dje i është drejtuar Gjykatës së Posaçme të Apelit. Struktura e Posaçme Kundër Korrupsionit dhe Krimit të Organizuar e ka ankimuar vendimin sepse sipas tyre, shkalla e parë nuk e ka zbatuar drejt ligjin dhe vendimi është i cenueshëm, ndaj kërkon që Apeli i Posaçëm të prishë vendimin e Shkallës së Parë dhe të marrë të pandehur Mediun dhe të vijojë gjykimi për të.
Sipas SPAK, ekzistojnë të gjitha kushtet dhe mundësitë ligjore për marrjen të pandehur dhe gjykimin e Mediut. Në kërkesën e bërë nga Prokuroria e Posaçme gjyqtari i çështjes, Erjon Çela nuk e ka arsyetuar vendimin dhe nuk është bazuar drejt në ligj, në prova apo në fakte prandaj Prokuroria e Posaçme shprehet se ky vendim duhet të prishet dhe ish-ministri i Mbrojtjes duhet të gjykohet për akuzat ndaj tij si shpërdorimi i detyrës i vetëm dhe në bashkëpunim.
Ja sesi GJKKO rrëzoi kërkesën e SPAK
Kujtojmë se Gjykata e Posaçme Antikorrupsion javën e shkuar rrëzoi në Dhomën e Këshillimit kërkesën e SPAK për rihapjen e hetimeve. Në argumentimin e vendimit të rrëzimit të kërkesës së SPAK, Gjykata e Shkallës së Parë deklaroi se kërkuesi, prokuroria, trashëgimtarët e viktimave duhet të paraqesin prova të reja që të mundësohet rihapja e çështjes.
Po ashtu në vendimin e zbardhur thuhet se prokuroria edhe pse i ka pasur mundësitë nuk ka bërë asnjë lëvizje dhe në këto kushte është parashkruar vepra penale kështu që sipas GJKKO nuk mund të ushtrohet ndjekje penale ndaj Mediut. “GJKKO çmon që të evidentojë se edhe pse kuadri kushtetues dhe ligjor përcakton se deputeti nuk gëzon imunitet parlamentar për ndjekjen penale apo gjykimin e tij konstatohet se që prej vitit 2012 e në vazhdim (më shumë se 8 vjet), organi i akuzës nuk ndërmori hapat e nevojshëm sipas ligjit për ushtrimin e ndjekjes penale megjithëse tashmë nuk ishte më e nevojshme që të kërkohej të jepej autorizimi nga Kuvendi i Republikës së Shqipërisë.
Në kushtet kur prokuroria nuk e ka ushtruar ndjekjen penale për një periudhë mbi dhjetë vjet edhe pse nuk ka pasur një pengesë të tillë, gjykata çmon se ajo nuk mund të ushtrohet më tashmë”, thuhej në vendimin e GJKKO. Në muajin shtator pritet që të caktohet një datë për gjykimin e kërkesës së SPAK nga Apeli. Nëse Apeli do ta prishë vendimin e Shkallës së Parë nuk dihet ende sesi do të procedojë SPAK. Por nëse vendimi i Shkallës së Parë mbetet në fuqi, atëherë nuk do të ketë një nisje hetimesh për ish-ministrin e Mbrojtjes.
