Prokuroria e Posaçme ka nisur zyrtarisht hetimet për shembjen e godinës së Teatrit Kombëtar. Partia Demokratike dhe Aleanca për Mbrojtjen e Teatrit bënë disa kallëzime duke pretenduar se kemi të bëjmë me shkelje, ndërkohë që dje prokuroria ka konfirmuar se pas verifikimit të padisë ka nisur hetimet.
“Ky procedim penal është në fazën e hetimeve paraprake dhe organi i akuzës është duke kryer veprime hetimore të plota dhe të gjithë anshme. Për shkak të detyrimit ligjor të ruajtjes së sekretit hetimor, në këtë fazë të hetimeve paraprake, nuk mund t’ju informoj në lidhje me veprimet hetimore konkrete të kryera nga ana e prokurorisë së Posaçme Kundër Korrupsionit dhe Krimit të Organizuar”, thuhet në deklaratën e SPAK.
Reagojnë artistët
Lidhur me qëndrimin e Prokurorisë së Posaçme ka reaguar edhe Aleanca për Mbrojtjen e Teatrit. Sipas tyre situata ka ndryshuar sepse ka një venim të Gjykatës Kushtetuese. sipas tyre, duhet të bëhet sekuestro preventive e truallit.
“E njëjta përgjigje erdhi edhe në emër të Aleancës për Mbrojtjen e Teatrit kur kërkuam se ku ishin hetimet në lidhje me çështjen e Teatrit Kombëtar. Sot jemi në një realitet të ri kur pas vendimit të Gjykatës Kushtetuese ka dalë një VKM e re e qeverisë që i rikalon pronën Bashkisë dhe një përgjigje e tillë është tejet e vonuar në kohë dhe ritëm.
Shpresojmë që SPAK mos legjitimojë me mos veprimin e tij fillimin e punimeve të paligjshme nga Bashkia në sheshin e Teatrit. Ne kemi kërkuar sekuestro preventive dhe ende nuk kemi asnjë reagim. Gjithsesi kallëzimet tona janë në sirtarët e SPAK dhe nuk mund të anashkalohen”, thuhet në deklaratën e Aleancës për Teatrin.
Valë padish në SPAK
Aleanca për Tetarin ka bërë një valë padish në SPAK për këtë çështje. Më fundit ishte më 2 gusht, ku përfaqësuesja e kësaj aleance, Adriana Kalaja dërgoi një padi, përmes të cilës ka kërkuar të zbatohet vendimi i Gjykatës Kushtetuese për teatrin.
“Jemi në momentin që pronat, sipas vendimit, duhet kthyer në gjendjen e datës 7 maj. Ne kemi argumentuar para SPAK se jo vetëm që ka shkelje të rënda të Kushtetutës, siç janë ato të shpërdorimit të detyrës, korrupsionit pasiv të zyrtarëve të larta, ajo e pengimit të zbatimit të një vendimi gjykate. Është e vërtetuar kallëzimi ynë i bërë me kohë, që në maj të 2020 që disponimi i truallit të teatrit përbën vepër penale.
Ne kemi kërkuar sekuestron për truallin. VKM e re bazohet në transferimin e truallit. Akuzat tona në lidhje që ka, që nga ligji special dhe VKM që u cilësuan si anti-kushtetues.
Po të shohim VKM e re, nuk ka të artikuluar fjalën Teatri Kombëtar, është sjellje tendecioze, jo vetëm anti-kombëtare, sepse duan të fshijnë historinë. Kjo VKM i hap rrugë, qartazi ndërtimit të kullave në teatër. E konsiderojmë emergjencë, pas 8 kërkesave për vendosjen e sekuestros”, ka deklaruar ajo.
