jyqtarja famëkeqe Mimoza Brahimi (Kajo), e rekrutuar nga Gjon Gjoni dhe Monika Kryemadhi për t’u marrë amerikanëve dyqanet ‘Duty Free’ në Rinas, nuk do të shkelë më në Gjykatën e Tiranës.
Disa ditë para se të nisnin pushimet e gushtit, Mimoza Brahimi (Kajo) ka paraqitur dorëheqjen nga drejtësia në Këshillin e Lartë Gjyqësor, ashtu siç edhe bëri padroni i saj, Gjin Gjoni, një vit më parë.
Në shtator, Mimoza Brahimi do të përjashtohet nga drejtësia për 15 vjet si e korruptuar. Vendimi është bërë gati nga Komisioni i Vetingut, por nuk është shpallur ende për shkak të pushimeve të gushtit.
Sipas burimeve, Mimoza Brahimi (Kajo) ka dhënë dorëheqjen sapo i është ngushtuar laku i Vetingut dhe pasi Komisioni i Vetingut, në bashkëpunim me hetuesit nga SHBA-BE, i kanë dërguar një dosje të zezë korrupsioni gjatë veprimtarisë së saj në drejtësi.
E sigurt për shkarkimin që e priste dhe për të mos ekspozuar në publik detaje nga dosja e saj e korrupsionit gjatë seancës dëgjimore në Komisionin e Vetingut, Brahimi ka dhënë dorëheqjen. Ajo shpreson se do të gëzojë në heshtje pasuritë që ka krijuar me çekiçin e korrupsionit dhe sidomos me aferën e fundit të madhe të saj, në të cilën e zhyti Gjin Gjoni.
Mimoza Brahimi ka deklaruar 40 milionë lekë dhuratë nga babai, ndërsa dyshohet se është mbuluar me para nga Gjin Gjoni për aferën e Rinasit. Tashmë pasuria e Mozës është një tjetër sfidë për SPAK.
Mimoza Brahimi (Kajo) u fut në listën e zezë nga amerikanët në vitin 2019, bashkë me ‘halldupin’ Avni Sejdi. Brahimi dhe Sejdi, me vendime skandaloze dhe korruptive, u rreshtuan në krah të Gjin Gjonit dhe Elona Çaushit, për të marrë peng dyqanet ‘Duty Free’ në Rinas, pasi kompania e gruas së Gjin Gjonit kishte humbur tenderin, i kishte mbaruar kontrata dhe rrjedhimisht i ishte djegur autorizimi për këtë veprimtari.
Nga ana tjetër, tenderin e kishte fituar kompania amerikane International Cruise Duty Free, e cila kishte lidhur edhe një kontratë me TIA-n.
Lëvizjet korruptive të Gjin Gjonit për të mbajtur me çdo kusht biznesin e bashkëshortes u denoncuan hapur nga ambasadorja amerikan Yuri Kim. Megjithatë, Gjin Gjoni, edhe pse kishte marrë një leje prindërore dyvjeçare nga Ilir Meta në KLD, u angazhua deri kur gjeti dy gjyqtarë KÇK, duke i mbajtur dyqanet me çdo kusht.
Fillimisht Gjin Gjoni arriri të rekrutonte ish-zëvendësministrin Financave Elton Haxhi i cili i firmosi gruas së tij për 24 orë rinovimin e licencës për ushtrimin e aktivitetit Duty Free në Rinas, edhe pse nuk kishte më kontratë dhe kishte humbur tenderin.
Skandali alarmoi Ambasadën Amerikane. Ambasadorja Yuri Kim zhvilloi një takim urgjent me Edi Ramën,
Pas takimit, Rama shkarkoi menjëherë Elton Haxhin, të cilin Gjin Gjoni e shëtiste me avion. Ministrja Anila Denaj anuloi menjëherë rinovimin e licencës së firmosur nga Haxhi. Por, tashmë Haxhi e kishte bërë punën e tij. Gjin Gjoni kërkoi në gjykatë lënien në fuqi të vendimit të Haxhit dhe rrëzimin e Denajt. Gjin Gjoni tërhiqte padinë sa herë kjo çështje e tij binte në duart e një gjyqtari që nuk ishte pjesë e rrethit të tij.
Më në fund Gjin Gjoni gjeti gjyqtarin Avni Sejdi, i cili me një vendim skandaloz dhe korruptiv, vendosi të linte në fuqi licencën e dhënë nga Haxhi, duke i bërë të mundur Gjin Gjonit të kontrollonte dyqanet dhe të dëbonte amerikanët nga Rinasi.
Në të njëjtën kohë, Gjin Gjoni, gjeti gjyqtaren Mimoza Kajo Brahimi, e cila vendosi që dyqanet në aeroport të kontrolloheshin nga Gjin Gjoni. Kështu, Avni Sejdi dhe Mimoza Kajo Brahimi vendosën të digjnin karrierën e tyre për Gjin Gjonin, i cili mbështetej në prapaskenë nga Monika Kryemadhi dhe Ilir Meta. Gjin Gjoni është një nga besnikët e Ilir Metës në punët e zeza, ndërsa gruaja e tij Elona Çaushi ka lidhje të forta me Monika Kryemadhin. Sa herë gruas së Gjin Gjonit i mbaronte licenca duty free, shkonte Monia Kryemadhi tek doganat dhe në Ministrinë e Financave për t’i rinovuar.
Për djegia e karrierës së Avni Sejdit dhe Mimoza Kajo Brahimit sigurisht që ka një çmim. Ka dyshime të forta se dy gjyqtarët kanë marrë qindra mijëra euro nga Gjin Gjoni, si shpërblim për vendimet e vështira, vendime të cilat, ashtu siç pritej, i futën në listën e zezë të amerikanëve si gjyqtarë të korruptuar.
Çdo vit, Departamenti Amerikan i Shtetit, kur publikon raportin për klimën e investimeve në Shqipëri, i referohet këtij skandali ende sot i pandëshkuar nga drejtësia.
Afera e Gjin Gjonit, Avni Sejdit, Mimoza Kajo Brahimit dhe Elton Haxhit, pritet të ketë pasoja të rënda. Kompania amerikane International Cruise Duty Free ka kërkuar 20 milionë euro në arbitrazhin ndërkombëtar. Dhe në fund, faturën e korrupsionit, do ta paguajnë si gjithnjë shqiptarët./Pamfleti
