Report Tv zbardh skenarin e opozitës që synon largimin e Ministrit të Brendshëm Fatmir Xhafaj. Nën drejtimin e Lulzim Bashës, opozita zhvilloi sot një takim në selinë blu, ku të pranishëm ishin Kryemadhi, Mediu, Ndoka dhe Dashamir Shehi.
Mësohet se nesër opozita do të zhvillojë një protestë duke nisur nga ora 12:00 përpara Ministrisë së Brendshme duke kërkuar largimin me çdo kusht të Fatmir Xhafajt. Por edhe pse ka organizuar protestën deri në detaje, Lulzim Basha nuk do marrë pjesë në këtë tubim. Kjo për shkak se kryetari demokrat do marrë pjesë në punimet e Saimit të Partive Popullore Europiane (PPE) në Sofje. Protestën pritet ta kryesojë kryetarja e LSI, Monika Kryemadhi.
Protesta është parashikuar të zhvillohet pa fjalime nga eksponentët e opozitës, ndërsa protestuesit do mbajnë në duar pankarta për largimin nga detyra të Fatmir Xhafajt. Gjithashtu, protestuesit do mbajnë edhe pankarta kundër kryeministrit Edi Rama.
Skenari të enjten/PD-LSI do bllokojnë parlamentin
Ndërsa ditën e enjte do të bllokohet parlamenti, ashtu sikur ndodhi edhe një javë më parë. Aksionet opozita i ka nisur që ditën e sotme, pasi i gjithë grupi i PD është paraqitur në komisionet parlamentare duke bllokuar punimet.
Opozita kërkon largimin e Ministrit të Brendshëm Fatmir Xhafaj, pasi e akuzojnë se ka mbrojtur vëllanë e tij, Agron Xhafaj, i cili është i dënuar nga drejtësia italiane me 7.2 vite për trafik droge. PD publikoi dje një përgjim të dy personave duke ngritur pretendimin se njëri prej tyre është Agon Xhafaj vëllai ministrit të Brendshëm. PD thotë se kjo bisedë e regjistruar tregon se Agron Xhafaj vijon ende aktivitetin kriminal.
Vëllai i ministrit Fatmir Xhafaj, Agron Xhafaj depozitoi kallëzim penal për tre zyrtarët e PD, Enkelejd Alibeaj, Ervin Salianji dhe Gazmend Bardhi duke i akuzuar se kanë sajuar prova. Agron Xhafaj pretendon se në asnjë moment zëri që është dëgjuar në përgjimin e publikuar dje nuk është i tij.
Demokratët pretendojnë gjithashtu se Xhafaj ka ndryshuar nenin 491 për ekstradimet, pikërisht për të mos lejuar dorëzimin te autoritetet italiane të vëllait të tij.
