Filmi artistik “Portreti i pambaruar i Clara Bellinit” me regji të Namik Ajazi e skenar të Ruzhdi Pulaha, fotografi Nino Celeste, ftoi çmimin “Filmi më i mirë me metrazh të gjatë”, në edicionin e 21 të Festivalit të Karlsruhe Gjermani.
Vlerësimin për filmin e bën me dije dhe Qendra Kombëtare e Kinematografisë. Së bashku me skenaristin Ruzhdi Pulaha dhe një kast të zgjedhur aktorësh shqiptarë e italianë, regjisori Namik Ajazi në filmin “Portreti i pambaruar i Clara Bellinit” sjell një histori të pamundur dashurie gjatë viteve të diktaturës.
Në film bëhet fjalë për historinë e dashurisë mes një djali shqiptar dhe vajzës së një diplomati të lartë Italian. Ngjarjet në film zhvillohen në fund të viteve ’70, fillim i ’80-ës dhe krahas historisë së dy të rinjve, tenton të sjellë edhe atmosferën e atyre viteve të vështira për shqiptarët.
Për të ndërtuar këtë histori, siç është shkruar më parë rreth filmit, regjisori Namik Ajazi ka punuar për gati tre vjet dhe ka bërë kërkime në ish-Arkivin e Ministrisë së Brendshme. Filmi është mbështetur në katër histori të vërteta, njëra prej të cilave i qaset më shumë asaj të filmit. Por më herët regjisori Namik Ajazi ka treguar se nuk mund të flitet për personazhe realë, pasi ajo ka marrë copëza nga disa syresh.
Kasti i aktorëve përbëhet nga aktori i njohur Remo Girone, i cili së bashku me aktoren Victoria Zinny interpretojnë prindërit e vajzës. Beatrice Aiello, një aktore e re me perspektivë vjen në rolin e protagonistes në film, po ashtu interpreton edhe Marta Gastini. Me role janë gjithashtu një kastë e mirë aktorësh shqiptarë si Alfred Trebicka, Gulielm Radoja, Raimonda Bulku, Mehdi Malkaj.
Filmi mbështetet nga Qendra Kombëtare e Kinematografisë dhe Ministria Italiane e Kulturës. Edicioni i 21 i Festivalit Ndërkombëtar Karlsruhe, Indipendent Days, u zhvillua nga data 21-25 shtator.
