Ish-kryeministri Sali Berisha duket se është ndër zyrtarët më të rrezikuar nga Prokuroria e Posaçme Kundër Krimit të Organizuar dhe Korrupsionit.
Në 19 maj në mënyrë surprizë, Departamenti Amerikan i Shtetit e shpalli ish-kryeministrin Sali Berisha “non grata”, ndërsa e akuzoi si të përfshirë në korrupsionin madhor dhe minimin e demokracisë në Shqipërisë gjatë kohës që ishte në krye të qeverisë.
Ky vendim e kapi në befasi Berishën dhe sikur të mos mjaftonte kjo kryedemokrati Lulzim Basha e përjashtoi atë nga grupi parlament demokrat. Mirëpo pavarësisht këtyre masave, ish-kryeministri ka sfiduar Bashën dhe Shtetet e Bashkuara të Amerikës, teksa ka deklaruara se nuk ka ndërmend të tërhiqet nga politika dhe Parlamenti. Madje, ai ka nisur edhe një fushatë takimesh me bazën demokrate, duke u treguar kështu muskujt “armiqve” të tij.
SHBA paralajmëron dorëzimin e dosjes
Por vendosmëria e Berishës për t’i sfiduar të gjithë, pritet të venitet, pasi amerikanët kanë paralajmëruar dorëzimin në prokurori të dosjes me afera të ish-kryeministrit. Pak ditë më parë ishte ambasadorja amerikanë në Tiranë, Yuri Kim që kërkoi hetime për ish-kryeministrin Sali Berisha, ndërkohë që të njëjtën gjë ka kërkuar edhe zv/Ndihmës Sekretari i Shtetit për Evropën Jugore dhe Qendrore, Gabriel Escobar.
Ky i fundit gjatë një interviste për “Zërin e Amerikës” këtë të shtunë, i pyetur nëse janë të gatshëm të bashkëpunojnë me një gjykatë shqiptare, apo autoritetet shqiptare nëse i kërkojnë SHBA-së të ndajë informacionet që ka për Berishën, tha: “Në lidhje me kalimin e informacionit tek Shqipëria, ne kemi tashmë një bashkëpunim shumë të fortë në fushën e zbatimit të ligjit, por edhe në fushën ushtarake dhe përcjellim shumë informacione. Nuk do të komentoj për ndonjë procedurë të veçantë ligjore, por ne kemi partneritet të mirë me Shqipërinë”, deklaroi diplomati Escobar.
Nga ana tjetër ai shpjegoi se pse erdhi tani vendimi për Berishën. Pra, SHBA mund të dorëzojë në prokurori dosjen me afera të ish-kryeministrit, çka tregon se ish-kryeministri Sali Berisha rrezikon të shkojë drejt dyerve të SPAK. “Ka disa arsye, e para, kemi kompetenca të reja. Pastaj, gjatë asaj periudhe, duhej bërë hulumtimi dhe duhej të siguroheshim, që jemi në gjendje të bëjmë përpunimin e informacionit”, tha ai.
Mesazhi i Kim
Më herët ambasadorja e Shteteve të Bashkuara të Amerikës në Tiranë, Yuri Kim iu bëri dy ditë më parë thirrje autoriteteve shqiptare të drejtësisë që të merrnin masat pas shpalljes “non grata” të ish-kryeministrit Sali Berisha.
“Pavarësisht nëse këto vendime janë për në Shqipëri apo ndokund tjetër në botë, siç e thashë më herët, në momentin që këto vendime certifikohen nga Sekretari i Shtetit dhe shpallen nga Sekretari i Shtetit, ato janë shumë të dukshme dhe do të ishte me vend që autoritetet vendase të shikonin masat”, deklaroi ambasadorja Kim për “Zërin e Amerikës”. /Rigels Seliman
