Rihetimi i tragjedisë së Gërdecit rrezikon të sjellë furtunë në politikën shqiptare. Gjykata e Posaçme e Apelit vendosi që të rrëzojë Shkallën e Parë për ish-ministrin Fatmir Mediu, duke i dhënë të drejtë SPAK që të nisë nga zeroja hetimet.
Por rihapja e hetimeve rrezikon që të shkohet më thellë në këtë çështje. Një ndër emrat që është akuzuar si i përfshirë në këtë tragjedi është djali i ish-kryeministrit, Shkëlzen Berisha. Nëse thellohen hetimet, atëherë ish-kryeministri është ndër më të rrezikuarit. Por personi kyç që mund të përcaktojë fatin e hetimeve dhe të vetë Berishës është ish-shefi i Shtabit të Ushtrisë Shqiptare, Luan Hoxha.
Në kohën kur ndodhi shpërthimi ai ishte në krye të ushtrisë dhe pak pas ngjarjes ai raportoi në ambasadën e SHBA ku përmendi djalin e ish-kryeministrit. Luan Hoxha më pas mori azil politik në SHBA, pas dënimit që iu dha këtu po për këtë ngjarje. Por sipas informacioneve, një ndër individët që ka kontribuar në hartimin e dosjes për Berishën është pikërisht ai.
Luan Hoxha ka raportuar pranë autoritetet më të larta amerikane në SHBA, si dhe ka vënë në dispozicion të tyre dokumente e fakte që kanë të bëjnë me tragjedinë e Gërdecit. Dyshimet janë se raportimet e tij janë pjesë e dosjes për shpalljen “non grata” të Berishës. Mirëpo nëse rihapen hetimet në themel, pritet që Hoxha të merret si dëshmitar kyç. Pra ai është individi që mund të fundosë familjen Berisha.
Dëshmitë e gjeneralit
Kur nisi procesi gjyqësor për Gërdecin, Luan Hoxha dëshmoi para gjykatës. Në atë kohë ai tha se vendi i demontimit u përcaktua nga ish-ministri i Mbrojtjes, pa iu marrë pëlqimi më parë shtabit. Sipas Hoxhës, fillimisht ishte përcaktuar fshati Bërzhitë i Tiranës si vend demontimi, por pas verifikimit të specialistëve, Shtabi i Përgjithshëm e rrëzoi si mundësi dhe me një vendim tjetër, ministri Mediu e firmosi Gërdecin pa dërguar ndonjë kërkesë për aprovim të Forcave të Armatosura.
Sipas dëshmitarit, urdhri në bazë të ligjit, duhej firmosur për zbatim dhe firma u hodh nga drejtori i kabinetit të Shtabit të Përgjithshëm, në mungesë të ish-gjeneralit. Sipas Hoxhës, ushtria nuk mund të kundërshtonte më një urdhër të dalë nga Ministria e Mbrojtjes. Ai pranoi se e ka vizituar Gërdecin, për një inspektim 8 minutësh, vetëm për anën ushtarake, e cila i përkiste në bazë të ligjit, në praninë e administratorit amerikan të SAC dhe atij shqiptar të Albademil, Delijorgji.
Gjyqi i Shkëlzen Berishës
Përveç Luan Hoxhës, emri i Shkëlzen Berishës u përmend dhe në librin “Armët dhe Çunat” të gazetarit Guy Lawson. Djali i ish-kryeministrit ngriti një padi për shpifje ndaj tij, por e humbi betejën në të dyja shkallët e gjyqësorit.
Pak muaj më parë u dha vendimi kundër tij në një gjykatë apeli në SHBA. Në vendimin që mban datën 2 shtator 2020, të gjykatësit Martin, Newsom, dhe O’scannlain, thuhet: “Autori librit Guy Lawson u mbështet në gjetjen e fakteve në shumë artikuj të publikuar më parë të cilat akuzonin Shkëlzen Berishën si i përfshirë në mashtrimin e kompanisë AEY dhe në botën e nëndheshme kriminale shqiptarë.
Lawson shkoi më tej duke intervistuar edhe persona te tjerë të cilët pohuan të njëjtën gjë për zotin Berisha”. Gjyqtarët amerikanë në vendim thonë se nuk kanë gjetur asnjë gabim në vendimin e gjykatës së Floridas dhe theksojnë se: “Berisha nuk solli argumente të bazuara përmes të cilave të mbërrinte në përfundimin e se gjykata e distriktit abuzoi duke mos i dhënë kohën e duhur për të sjellë provat”.
Vetë gazetari amerikan, Lawson, shprehej pas vendimit të Gjykatës së Shkallës së Parë: “Kam kënaqësinë të them se Shkëlzen Berisha e ka humbur gjyqin, duke justifikuar raportimin tim gjatë gjithë vitit për ngjarjet që rrethojnë tragjedinë në Gërdec, por vendimi është aktualisht në apel, prandaj nuk mund të komentoj plotësisht deri në momentin ligjor kur procedurat të jenë të plota. Në këtë përvjetor zemra ime bashkohet me familjarët e viktimave të Gërdecit dhe shpresoj se libri im do të kontribuojë në përpjekjen për të sjellë para drejtësisë ata që shkaktuan atë fatkeqësi humanitare”.
Dëshmia e sekretares së Bumçit
Nëse shkohet te rihetimi i Gërdecit, është një tjetër individ që përmend djalin e ish-kryeministrit. A. Agolli, ish-sekretarja e ministrit të Drejtësisë, Aldo Bumçi, ka qenë protagoniste e një faksi që ka të bëjë me Gërdecin. Sekretarja Agolli ka shpjeguar te prokurorët procedurën si e ka protokolluar faksin dhe si është dërguar ai në Ministrinë e Mbrojtjes. Bëhet fjalë për një faks privat që ministri Aldo Bumçi i ka dërguar për informim Shkëlzen Berishës, për t’i kujtuar se ia ka firmosur “Memo”-n që aprovonte biznesin e tij në Gërdec. Më vonë Berisha e mohoi këtë faks, duke sulmuar disa herë sekretaren.
