Deputeti i Partisë Socialiste, Petro Koçi ka komentuar dje situatën politike brenda Partisë Demokratike dhe turin e ish-kryeministrit Sali Berisha në bazën demokrate, pas përjashtimit të tij nga grupi parlamentar demokrat.
Përmes një statusi në rrjetet sociale, deputeti socialist Koçi shprehet se rebelimi i ish-kryeministrit Berisha ndaj kryedemokratit Lulzim Basha është më shumë hipokrizi, për sa kohë që informacionet, akuzat e fundit të artikuluara nga ish-lideri demokrat në adresë të shefit të selisë blu kanë qenë aty dhe nuk janë dëgjuar ndonjëherë.
Sipas tij, Berisha i ka shpallur “luftë” Bashës sapo e pa që ai e “vrau” atë politikisht. “Sali Berisha këto informacionet për financimet ruse i ka ditur prej kohësh, por ia pati fshehur publikut dhe Partisë Demokratike sepse Lulin e gjykonte besnik ndaj tij. Dhe ky ishte për të interesi kryesor.
Tani që Luli i doli i pabesë, Sali Berisha po zbulon të vërtetat tronditëse”, shkruan ai. Megjithatë më tej në shënimin e tij deputeti Koçi shpreh bindjen se ish-kryeministri Sali Berisha është i tmerruar nga drejtësia dhe se sipas tij, aksioni në bazën e Partisë Demokratike më shumë është mesazh për Shtetet e Bashkuara të Amerikës se sa për kryedemokratin Lulzim Basha. Sipas zotit Koçi, Berisha nuk ka hallin e PD, por të familjes se tij.
“Sali Berisha nuk ka hallin e Partisë Demokratike, por të familjes së tij. Mesazhi që kërkon të japë është kërcënimi se po u prek nga drejtësia do të këtë kryengritje masive. Është mesazh më shumë ndaj Shteteve të Bashkuara të Amerikës sesa ndaj Lulzim Bashës. Kartë e djegur”, nënvizoi ditën e djeshme deputeti i Partisë Socialiste, Petro Koçi.
