Pas vendimit të Lulzim Bashës për përjashtimin e Sali Berishës nga Grupi Parlamentar i PD-së vetëm 1 ditë përpara seancës së parë të legjislaturës së re në Kuvendin e Shqipërisë, të shumtë ishin deputetët demokratë që nuk ranë dakort me vendimin e kryetarit të tyre.
Të parët që dolën kundër ishin Edi Paloka dhe Flamur Noka, të cilët kritikuan hapur Lulzim Bashën për vendimin e marrë pa dëgjuar vendimin e organeve më të larta të PD. Të dy deputetët para seancës së parë plenare epritën Berishën poshtë shtëpisë së tij, për ta shoqëruar në Kuvend, madje edhe aty u ulën pranë tij.
Deputeti i tretë që “tradhtoi” Bashën dhe iu bashkua Berishës ishte Tritan Shehu, i cili mori pjesë edhe në “Foltoren” e Gjirokastrës. Në Vlorë, “Foltores” iu bashkua Bujar Leskaj, i cili mban edhe postin e drejtuesit politik të këtij qarku.
Luan Baçi mblodhi përkrahësit demokratë në “Foltoren” e Fierit, duke shprehur hapur qëndrimin e tij pro Berishës, teksa u shpreh se edhe po të kthehej pas, sërish do kishte zgjedhur të mbështeste ish-kryeministrin.
Edmond Spaho doli hapur me një reagim në rrjetet sociale kundër Bashës, duke u shprehur se Pd ka nevojë për një lider që ta çojë drejt fitores, teksa më pas pati edhe përplasje në distancë me kolegun e tij Ervin Salianji.
Oerd Bylykbashi, të cilit Lulzim Basha i hoqi “Zgjedhoren” për t’ia kaluar nënkryetarit Enkelejd Alibeaj, zgjodhi të mbështesë Berishën në “Foltoren” e Durrësit. I fundit që “la në baltë” Bashën për ish-kryeministrin Berisha është Luçiano Boçi, deputeti i Elbasanit që Basha e la jashtë listës së sigurt, por ia doli ta “thyente” listën e PD dhe të merrte mandatin e deputetit.
Kanë mbetur ende shumë qytete ku Berisha do të mbajë “Foltoren”, ndaj pritet që deputetë të tjerë t’i bashkohen ish-kryeministrit, që tashmë ka shprehur hapur dëshirën për t’u kthyer sërish në krye të PD-së.
