Kryeministri Edi Rama e ka nisur fjalën e tij në Kuvend me një përgjigje ndaj kryedemokratit Lulzim Basha, pas përplasjeve të këtij të fundit me deputetin socialist, Eduard Shalsi, teksa e cilësoi këtë të fundit “plehrë, fundërrinë…”.
Kryeministri Rama shprehu keqardhje për gjuhën e përdorur, teksa iu drejtua Bashës, duke i thënë që të mos imitojë foltoren e ish-kryeministrit Sali Berisha.
“Së pari, një shprehje keqardhje për atë lokorenë, në vend të mirëmëngjesit. Pas ardhjes i fundit këtu, z. Lulzim, dhe ta kam thënë disa herë publikisht, por edhe personalisht, mos imito ato të foltores, sepse origjinali është gjithmonë më i besueshëm se kopja.
Sa më shumë klith, si ai i foltores, aq më shumë dukesh personazhi i qajtores. Një burrë që vë kujën me fjalë të cilat si prind u thua përditë fëmijëve të tu se nuk përdoren asnjëherë, dhe e bën këtë në mes të 139 burra e grave të tjerë dhe në sy të kushedi sa tjerëve që na ndjekin, është një burrë në pikë të hallit.
Megjithatë, hallin që ke sado ta qajmë nuk ta zgjidhim dot. Duke ju referuar atyre që u thanë këtu, meqë u soll FMN, FMN e kam këtu përpara në deklaratën, në përfundim të misionit dhe po e citoj ‘Ekonomia e Shqipërisë ka treguar një qëndrueshmëri të konsiderueshme pas tërmetit dhe pandemisë. Pas vitit të vështirë 2020 aktiviteti ekonomiko po ringrihet fuqishëm’”, tha Rama
Edi Rama gjatë fjalës së tij në Kuvend nuk i kurseu batutat me kryedemokratin Lulzim Basha.
Rama thumboi Bashën duke i thënë që mos të bëhet si ai, duke iu referuar Sali Berishës, pas fjalëve të rënda që u hodhën në Parlament mes kryedemokratit aktual dhe deputetit socialist, Eduart Shalsi.
.
“Mos e imito atë, se po imitove atë re në gropë. Ta kam thënë dhe publikisht dhe personalisht: Mos u bëfsh kurrë si ai. Rri në lartësinë e flokëve të rregulluara që ke, dhe xhaketën që ke veshur, dhe mos e prish gojën siç e prishe sot. Nuk mund të bëhesh dot ti goja më e shthurur. Se unë ta them se të konsideroj edhe mik,” , u shpreh Rama.
Ndërkohë shihej Basha nga vendi i tij që nuk mbante dot të qeshurën.
