Qetësia dhe dashuria mes presidentit Ilir Meta dhe kreut të Partisë Demokratike, Lulzim Basha ka marrë fund. Përveç ish-kryeministrit Sali Berisha edhe presidenti Meta është kthyer në target i sulmeve dhe akuzave të kreut të opozitës.
Të martën në mbrëmje kryedemokrati Basha zhvilloi në selinë blu një takim me krerët e degëve të PD në të gjithë vendin, ndërsa gazeta ka mësuar detaje të reja nga ato çfarë janë diskutuar aty. Sipas informacioneve, mësohet se zoti Basha ua ka bërë të qartë krerëve të degëve që vetingu në politikë është një nismë serioze e demokratëve, ndërsa është shprehur se kreu i shtetit dhe Lëvizja Socialiste për Integrim po tentojnë ta ndalin atë.
Por i prerë dhe i sigurtë, mësohet se zoti Basha ka theksuar se vetingun nuk mund ta bllokojë Meta dhe njerëzit e tij, ndërsa ka dhënë garanci se kreu i shtetit s’ka asnjë shans të marrë frenat e opozitës, sikundër ky i fundit pretendon. “LSI ka kohë që nuk ndihet në Kuvend, megjithëse ajo ka rrahur gjoksin se do përfaqësojë interesat e shqiptarëve ka heshtur të ndërmarrë ndonjë nismë.
Surrogatët e saj mediatikë kanë nisur ofensivën ndaj PD dhe padyshim SHBA. Njësoj si tek “Foltorja” e Berishës. Këto ditë sulmi është drejtuar ndaj vetingut në politikë edhe pse Petrit Vasili ka firmosur një nismë të tillë në 2018. Për LSI nuk ka rëndësi koherenca!
Nga ana tjetër presidenti Meta e ka premtuar rikthimin tek kjo parti se në krye të opozitës s’ka shanse. Por ku është Ilir Meta që premtoi se nuk do dekretonte qeverinë e re, nëse PS do vidhte zgjedhjet parlamentare të 25 prillit?! LSI pretendon se zgjedhjet janë vjedhur, por Meta e bekoi qeverinë “Rama 3”. Tani përse vetingu në politikë shqetëson surrogatët e LSI në media”, mësohet të jetë shprehur Basha.
Bashkëpunëtorët e Metës do shkrihen si sheqeri
Por sikundër theksuan të njëjtat burime, mësohet se kryetari i Partisë Demokratike, Lulzim Basha ka zbuluar në mbledhjen e dy ditëve më parë me krerët e degëve të PD edhe arsyet se përse Presidenti Ilir Meta dhe njerëzit e tij nuk e duan vetingun në politikë.
Mësohet se kryedemokratit Basha është shprehur se vetingu në politikë do të fundosë bashkëpunëtorët e Metës dhe se sipas tij, vetëm Partia Demokratike është alternativa më e mirë për qytetarët. “Të dashur demokratë është e thjeshtë, ata nuk e duan vetingun në politikë, pasi digjen. Më saktë digjen disa prej tyre, e kuptoni ju që janë ata që partinë e konsiderojnë pronë personale.
Prandaj ata kanë nisur sulm frontal ndaj Komisioneve Hetimore dhe nismave tona. Kështu që frika se disa përfaqësues të Lëvizjes Socialiste për Integrim treten si sheqeri në ujë nuk ka pse të jetë shkak që surrogatët mediatike të sulmojnë Partinë Demokratike. PD është e vetmja alternativë për shqiptarët. Ne jemi shpresa e vetme”, mësohet të jetë shprehur Basha. Më herët gjatë kësaj jave kryedemokrati Lulzim Basha ka dhënë garanci se politikanët e korruptuar nuk e duan vetingun në politikë.
“Politikanët e korruptuar, janë bashkë kundër ndryshimit, PD-së dhe Shqipërisë. E duan Shqipërinë në gjunjë, ku ata fitojnë dhe shqiptarët humbasin. Nuk do ja dalin! Vetingu do pastrojë politikën nga llumi i tranzicionit”, deklaroi Basha./Kliti Topalli
