Struktura e Posaçme Kundër Korrupsionit dhe Krimit të Organizuar ka rihapur dje hetimet për tragjedinë e “Gërdecit”. Gjykata e Posaçme e Apelit në datën 24 shtator 2021 ka rikthyer për hetim në SPAK dosjen e “Gërdecit”.
Në vendimin e Apelit të GJKKO-së thuhej se çështja nuk është gjykuar dhe se heqja e imunitetit të Mediut i hap rrugë procesit për rihetim. Por fill pas kësaj Gjykata e Lartë ka dërguar dje në Prokurorinë e Posaçme dosjen arkivore të “Gërdecit”. Përmes një njoftimi për shtyp, SPAK bëri ditën e djeshme me dije se ka regjistruar procedim penal ndaj ish-ministrit të Mbrojtjes, Fatmir Mediu, për çështjen e “Gërdecit”.
Sipas Prokurorisë Speciale, zoti Mediu akuzohet për shpërdorim të detyrës të kryer në bashkëpunim. “Prokuroria e Posaçme Kundër Korrupsionit dhe Krimit të Organizuar, në zbatim të vendimit nr. 205, datë 24.09.2021, të Gjykatës së Posaçme të Apelit, pasi ka tërhequr nga Gjykata e Lartë aktet e dosjes penale në ngarkim të z. Fatmir Mediu, ka regjistruar procedim penal për veprat penale: “Shpërdorim i detyrës”, kryer në bashkëpunim, si dhe “Shpërdorim i detyrës” në bashkëpunim me subjekt ushtarak, kuadër komandues, të parashikuara nga nenet 248 dhe 25 të Kodit Penal dhe 70/2 e 2 të Kodit Penal Ushtarak, në ngarkim të të pandehurit Fatmir Mediu”, thuhet në njoftimin e SPAK.
Përveç Mediut, të rrezikuar edhe persona të tjerë
Por me rinisjen e hetimeve për çështjen “Gërdeci”, Prokuroria e Posaçme Kundër Korrupsionit dhe Krimit të Organizua pritet të kërkojë në GJKKO gjykimin e ish-ministrit dhe po ashtu edhe veprime hetimore shtesë. Kjo do të thotë se përveç ish-ministrit të Mbrojtjes, Fatmir Mediu të rrezikuar edhe persona të tjerë të përfshirë në aferën e armëve në Gërdec.
Pra në kuadër të hetimeve të reja për ish-ministrin Mediu, mund të ketë surpriza, pasi mund të dalin edhe emra të përfshirë në aferën e Gërdecit sa i takon demontimit të armëve, trafikut të armëve dhe jo vetëm. Kujtojmë që në shpërthimin e Gërdecit më 15 mars të 2008 humbën jetën 26 persona, ndërsa u plagosën mbi 300 të tjerë. Hetimet për tragjedinë e 26 të vdekurve e qindra të plagosurve e një dëmi miliarda lekë, janë kryer nga 2008-2009, asokohe nga Prokuroria e Përgjithshme. Ndërkohë Apeli i GJKKO në muajin shator të këtij viti mori vendimin për rikthimin për hetim në SPAK të dosjes, duke pranuar kështu kërkesën e prokurorisë dhe të familjes Durdaj.
Mediu: S’i jam shmangur kurrë gjykimit
Megjithatë sa i takon kësaj çështje, pak ditë më parë ish-ministri i Mbrojtjes, Fatmir Mediu ka deklaruar se ai nuk i është shmangur gjykimit për tragjedinë e “Gërdecit”. Teksa ishte i ftuar në një studio televizive, Mediu theksoi se nuk njeh imunitet. “Kur Fatmir Mediu i është shmangur gjykimit? Kur ndodhi gjykimi kam dhënë dorëheqjen dhe kam marrë përgjegjësitë e mia morale dhe kam mirëkuptuar çdolloj sjellje të familjarëve të prekur karshi meje. Që ditën e parë të dorëheqjes time kam deklaruar se nuk njoh imunitet dhe i kam çuar letër presidentit, Prokurores së Përgjithshme që jam i gatshëm që në çdo kohë të pyetem”, deklaroi Mediu.
