Kryeministri Edi Rama së bashku me ministren e Shëndetësisë Ogerta Manastirliu, prezantuan dje Buxhetin e vitit 2022 për Shëndetësinë. Kryeministri deklaroi rritje pagash për mjekët dhe infermierët dhe ambicia e qeverisë është që pagat të rriten çdo vit me synimin +40 për qind brenda këtij mandati të tretë dhe +6 për qind vitin e ardhshëm.
Sipas Ramës është e rëndësishme që mjekët të mos paguhen të gjithë njësoj sado që të rriten pagat, por mbi rrogën bazë të fillojnë pagesa të ndryshme në bazë të kontributit dhe performancës së mjekut. “Qysh prej hapit të parë që kemi hedhur, pagat e mjekëve dhe infermierëve janë rritur 63 për qind.
Natyrisht që ne nuk jemi të vetë përmbushur nga ky fakt dhe ambicia jonë është që pagat të vazhdojnë të rriten çdo vit me synimin për të kapur +40 për qind brenda këtij mandati të tretë dhe +6 për qind vitin e ardhshëm. Ndërkohë që aspirojmë për më tepër si në të gjithë fushat e tjera, nuk lë vend për vetëkënaqësi se ka boshllëqe për të mbushur. Kjo që kemi bërë është shumë inkurajuese, e tha edhe Ogerta, ne detyrën bëjmë.
E dëgjojmë dhe këtë shpesh për punët e mira, që kur nuk ke çfarë thua, ka disa që gjejnë fjalinë “hë se detyrën bëtë”. Qeveritë për detyrën zgjidhen. Spitali memorial i Fierit është një eksperiencë e re por edhe një hap i parë për autonominë spitalore. Mjekët të mos paguhen të gjithë njësojë sado të rriten pagat, por të fillojë një pjesë tjetër që mbi rrogën bazë të fillojnë pagesa të ndryshme sipas kontributit dhe performancës”, tha Rama.
Rritje pagash për mbi 18 mijë persona
Nga ana tjetër ministrja e Shëndetësisë Ogerta Manastirliu dje në fjalën e saj deklaroi se buxheti i vitit 2022 për Shëndetësinë do të jetë 70 mln dollarë më shumë se buxheti i vitit 2021. “Buxheti i 2022 është i pari kapitull i vizionit që ne kemi për shëndetësinë.
Do të jetë 360 mln dollarë, 70 mln dollarë më shumë se buxheti i 2021. Garanton rritje pagash për mbi 18 mijë personel shëndetësor, bonus 2.5 mln për personelin që punon larg vendbanimit. Për mjekët dhe infermierët punësimi do të jetë transparent, përmes portave të mjekëve, infermierëve. Për qytetarët buxheti i 2022 garanton financimet për programet e shëndetit publik. Mbështet me 2.7 mln lekë planin e vaksinimit anti-COVID.
Buxheti 2022 garanton modernizimin e i infrastrukturës së kujdesit shëndetësor. Nisim rikonstruksionin e qendrës kombëtare të transfuzionit të gjakut. Mos harrojmë revolucionin dixhital, do ta shtrijmë në sistemin farmaceutik për rritjen e transparencën dhe po ashtu rritjen e sistemeve të reja të Survejancës Epidemiologjike”, deklaroi ajo.
Komisioni i Sigurisë miraton buxhetin
Ndërkohë dje Komisioni i Sigurisë ka miratuar dje buxhetin nen për nen, duke vulosur kështu rritjen e pagave për policët dhe për ushtarakët. Policët që përfitojnë janë ata që kryejnë shërbimin jashtë qendrave të banuara, ndërsa sa i takon ushtarakëve do të ketë rritje page për të gjitha kategoritë.
