Ilir Meta duket se ka marrë flamurin e patriotizmit për të goditur amerikanët dhe kryeministrin Edi Rama. Para tij ishte ish-kryeministri Sali Berisha ai që përdori këtë strategji për të ngritur alibi sa i takon shpalljes së tij “non grata” dhe të njëjtën linjë po ndjek edhe presidenti.
Meta ka nisur një tur takimesh në Kosovë ku ka sulmuar ashpër nismën e Ballkanit të Hapur dhe ndryshimin e kufijve. Mesazh ky i drejtpërdrejtë ndaj kryeministrit Edi Rama dhe SHBA që e kanë mbështetur këtë nismë.
Në kuadër të vizitës Meta u mirëprit në një takim nga Kryetari i Kuvendit të Kosovës, Glauk Konjufca. Presidenti tha se Procesi i Berlinit është gjithëpërfshirës dhe ka dhënë rezultate, ndryshe nga “Ballkani i Hapur”. Sipas Metës kjo nismë është përçarëse dhe përjashtuese teksa shtoi se një domosdoshmëri për Kosovën është liberalizimi i vizave.
“I shpreha vlerësimet për përparimin e gjithanshëm të Kosovës, në veçanti për proceset e fundit zgjedhore, si një shembull i shkëlqyer i konsolidimit të institucioneve, shtetit ligjor dhe nivelit të demokratizimit. Me rëndësi për forcimin e gjithanshëm të marrëdhënieve strategjike, konkretizimi me nisma ligjore të marrëveshjeve ndërqeveritare. Ndamë të njëjtin vlerësim për vijimin e Procesit të Berlinit.
Procesi i Berlinit është gjithëpërfshirës dhe ka dhënë rezultate konkrete, pasi shoqërohet me garancitë dhe mbështetjen financiare të BE-së, që ka ngritur mekanizma zbatues dhe monitorues. Përkundrejt kësaj, Ballkani i Hapur është nisëm përçarëse dhe përjashtuese. Liberalizimi i vizave për qytetarët e Kosovës është një domosdoshmëri, që urojmë të ndodhë sa më parë”, u shpreh ai.
Gjatë takimit me Kryetarin e Kuvendit, Presidenti u ndal edhe tek ndryshimi i kufijve ku u shpreh se duhet konsensus politik si dhe një platformë gjithëpërfshirëse për vijimin e dialogut me Serbinë. Meta tha se duhet një bashkëpunim më i ngushtë me partnerët strategjikë.
Edhe Osmani me Kurtin sulmojnë “Ballkanin e Hapur”
Presidenti takoi edhe homologen Vjosa Osmani. Presidentja ka theksuar gjatë këtij takimi me presidentin shqiptar, Meta se është kundër çfarëdo ideje, e cila përpiqet ta trajtojë në mënyrë jo të barabartë Kosovën. “Kosova nuk mund të bëhet pjesë e iniciativave apo mekanizmave rajonalë, nëse përfaqësimi në këto iniciativa që nga zanafilla nuk është gjithëpërfshirës dhe mbi parimin e barazisë”, ka theksuar presidentja Osmani.
Për “Ballkanin e Hapur” me presidentin e Shqipërisë ka diskutuar edhe kryeministri i Kosovës, Albin Kurti gjatë takimit që patën të enjten e 25 nëntorit. Kryeministri Kurti përsëriti qëndrimin se nuk mund të ketë “Ballkan të Hapur” kur Serbia është e mbyllur ndaj Kosovës, nuk ia njeh diplomat, dokumentet e identifikimit, certifikatat e vulat doganore.
“Përherë i lumtur të takohem me Kryeministrin e Kosovës, Albin Kurti, me të cilin ndamë sot në Prishtinë urimet më të përzemërta me rastin e festës kombëtare, Ditës së Flamurit. Vlerësuam marrëdhëniet strategjike dhe vëllazërore mes dy vendeve tona, si dhe theksuam domosdoshmërinë që marrëveshjet ndërqeveritare të konkretizohen në praktikë, për t’i shërbyer në mënyrë thelbësore forcimit të lidhjeve, si dhe përmirësimit të jetës së qytetarëve tanë”, shkroi presidenti.
Teksa Kurti kërkoi që Shqipëria ta mbrojë Kosovën nga sulmet e Serbisë në organizatat dhe institucionet ndërkombëtare, presidenti shprehu gjithë mbështetjen e tij ndaj vëllezërve kosovarë teksa shtoi se është mjaft e rëndësishme konsultimi dhe mbështetja nga të gjitha forcat politike.
