Deputeti i Partisë Socialiste për Qarkun e Fierit, njëherësh kreu i PS për qytetin e Fierit, Petro Koçi ka komentuar dje situatën politike në vend, ndërsa ka kritikuar ashpër ish-kryeministrin Sali Berisha dhe presidentin Ilir Meta.
Përmes një statusi në rrjetet sociale të cilin e ka publikuar ditën e djeshme, por që është shkruajtur para disa kohësh, deputeti socialist Koçi shprehet se presidenti Meta është kopje e ish-kryeministrit Berisha, ndërsa theksoi se ai po sillet si të fortët e lagjes. “Presidenti Ilir Meta po sillet me arrogancën e të fortëve.
Kërcënon integritetin fizik të njerëzve me lehtësi kriminale. Të kujton bëmat e babait të tij shpirtëror, Sali Berisha në ‘92-‘97. Ky sa herë ka zgjedhje del “kandidat” për kryeministër dhe forcë e parë politike. Mjerë Presidenca ku është katandisur”, shkruan ai.
Ndërkohë gjatë një prononcimi për mediet ditën e djeshme, deputeti Koçi theksoi se deklaratat e Metës nuk duhet të merren mjaftueshëm seriozisht, pasi kohët e fundit ato kanë shprehur edhe çekuilibër psikologjik sipas deputetit socialist.
“Ne besojmë se telefonat përgjohen, kur flet presidenti i Republikës, duhet të flasë në emër të një informacioni të sigurt, jo të flasë kuturu. Por, ka një gjë, që Meta është një president që nuk merret dhe aq seriozisht.
Pra, ne e dimë që vitet e fundit ka bërë lloj-lloj deklaratash të cilat kanë shprehur edhe çekuilibër psikologjik”, nënvizoi Koçi.
Kujtojmë që Presidenti i Shqipërisë, Ilir Meta ka bërë një deklaratë të fortë në një nga intervistat televizive duke thënë se ai përgjohet nga shërbimet sekrete të brendshëm dhe të huaja.
Meta ka treguar një rast që lidhet me zgjedhjet e 30 qershorit në vendin tonë. Presidenti ka theksuar se gjatë një udhëtimi me avion i kishte telefonuar Gramoz Ruçit, për anulimin e zgjedhjeve, ndërsa ka shtuar se Ruçit i komunikoi vetëm gjërat bazike, pasi sipas tij telefoni i presidentit përgjohej.
