Fiks 7 vite më parë, në qeverinë Rama 1 institucionet shtetërore arritën një koordinim të pazakontë vetëm për të miratuar koncesionin për kompaninë “Albtek energy”, i cili hapi rrugën për inceneratorët.
Ndërkohë, pas shtatë vitesh koordinimi duket i njëjtë, madje të bën përshtypje edhe koha e arrestimit të ish-ministrit Lefter Koka. Ai u arrestua pas urdhrit të SPAK në javën që përfundonte afati i koncesionit dhe asetet e inceneratorit do t’u kalonin bashkive.
Pas 16 procedurave të ndërmarra në kohë rekord jashtë çdo parashikimi ligjor, më datë 17 dhjetor të vitit 2014 Këshilli i Ministrave miratoi kontratën koncesionare për inceneratorin e Fierit me vlerë 21.6 milionë euro. “Koncesioni jepet për një periudhë prej 7 (shtatë) vjetësh nga data efektive dhe përfundon në ditën e përvjetorit të shtate të datës efektive (“Periudha efektive”).
Kontrata koncesionare mbaron me përfundimin e afatit 7-vjeçar. 27.2 Mbarimi i kontratës si përfundim i afatit të saj ose në rast të zgjidhjes së parakohshme, nuk e zhvesh koncesionarin nga detyrimi për pagimin e detyrimeve të prapambetura ndaj Autoritetit Kontraktues dhe të trentëve.
Kostot e parashikuara të investimeve janë kostot totale e investimeve që do të kryhen nga Koncesionari për zbatimin e projektit para datës së përfundimit të punimeve me vlerë prej 21.666.111 Euro (pa TVSH)”, thuhet në kontratën e siguruar nga gazeta “Panorama”. Ndërkohë, një muaj para se të përfundonte afati i kontratës së koncesionit për kompaninë “Albtek Energy”, Këshilli Bashkiak i Elbasanit më datë 18 nëntor u mblodh për të miratuar ndër të tjera themelimin e një shoqëri aksionere ku dominuese në aksione rezulton Bashkia e Elbasanit për të marrë në dorëzim inceneratorin.
“Vendim mbi miratimin e themelimit të shoqërisë tregtare të përbashkët ‘ECO ELB’ sh.a. Mbi autorizimin për përfaqësimin e Bashkisë Elbasan si aksionere në mbledhjet e asamblesë së përgjithshme të shoqërisë ‘ECO ELB’ sh.a., thuhet në vendimin e Këshillit Bashkiak. Ndërkohë, në datën 6 dhjetor është bërë regjistrimi i SHA-së me aksioner Bashkinë Elbasan dhe 6 bashkitë e tjera të qarkut. Sipas ekstraktit të nxjerrë nga Qendra e Biznesit, Bashkia Elbasan disponon 52% të kuotave, ndërsa 6 bashkitë e tjera nga 8%.
KOORDINIMI?!
Gati 1 javë para se të përfundonte afati i koncesionit për inceneratorin e Elbasanit dhe pasi bashkitë e qarkut lokal kishin ndërmarrë të gjitha veprimet për të marrë asetet e inceneratorit, Pro kuroria e Posaçme Antikorrupsion finalizon hetimet dhe arreston ish-ministrin Koka dhe shpall në kërkim administratoren Stela Gugallja dhe Klodian Zoton, konkretisht administratoren dhe pronarin.
Ajo që bie në sy është çështja nëse kemi të bëjmë me një rastësi të përfundimit të hetimeve dhe lëshimit të urdhër arresteve apo ka pasur një koordinim që Bashkitë të kishin mundësi të themelonin shoqërinë aksioner për të administruar inceneratorin dhe të mos krijohej kaos me pastrimin e qyteteve. Megjithatë, duket se një gjë e tillë nuk është shmangur pasi koncesionari neglizhoi punën pak para përfundimit të kontratës.
Qyteti i Elbasanit vazhdon të jetë i mbushur me mbeturina thuajse në të gjitha rrugët e tij. Firma e pastrimit, “Viktoria Invest” është tërhequr pas mbarimit të kontratës, duke marrë me vete makineritë dhe kontejnerët si dhe duke lënë qytetin në një situatë kaotike. Nga dje, Bashkia e Elbasanit ka lidhur kontratë me firmën e re “Aleko Impex General Construction”, e cila ka nisur menjëherë nga puna.
“Kemi një problematikë me mbarimin e kontratës së kompanisë. Ky ngërç krijoi impakt negativ në qytet. Ne e përballuam situatën me mjetet tona. Tani janë vendosur kontejner të ri. E gjithë kjo situatë merr fund. Sasia e kontejnerëve është 520, ndërsa më parë ishin 700 por ishin më të vegjël”, u shpreh Dybeli, shefi i Inspektoratit të Mjedisit në Bashkinë Elbasan.
KRONOLOGJIA E NGJARJEVE
18 nëntor: Këshilli Bashkiak i Elbasanit vendos për themelimin e shoqërisë aksionere “ECO-ELB”
6 dhjetor: 7 Bashkitë, Elbasan, Librazhd, Përrenjas, Gramsh, Belsh, Cërrik e Peqin, themelojnë shoqërinë aksionere “ECO-ELB”
./Panorama
14 dhjetor: Arrestohet ish-ministri i Mjedisit, Lefter Koka, dhe shpallen në kërkim pronarët e kompanisë që fitoi koncesionin
17 dhjetor: Përfundon kontrata e koncesionit, inceneratori u kalon 7 bashkive. /Panorama
