Analisti Fatos Lubonja ka rrëfyer dy takimet me multimiliarderin George Soros. Lubonja tregoi se takimi i parë me Sorosin ka qenë në Nju Jork, në vitin 1997, ku siç u shpreh analisti, miliarderi e ka pyetur si fillim për skemën e piramidave në Shqipëri, dhe më pas për fondacionin e tij dhe si po ecte ai në vendin tonë. Ndërsa takimi i dytë, sipas Lubonjës, ka qenë në vitet 2000, kur Sorosi kishte ardhur në Shqipëri.
“Jam më në gjendje të flas për Sorosin si fondacion, si politika, ndërsa sa i përket Sorosit vetë, unë e kam takuar dy herë dhe nuk mund ta quaj bashkëpunim.
Takimin e parë e kam pas në Nju Jork, më 1997, kur kishte rënë shteti ynë me piramidat, mora një çmim atje dhe më thanë që më kërkonte Sorosi për të më takuar. Arritëm te zyra e tij dhe patëm një bisedë. Ishte njohje e parë, ishte në një zyrë që çuditërisht nuk kishte asgjë, vetëm një tryezë.
Ishte pak kurioz për piramidat, pastaj u interesua edhe për fondacionin, se si ka punuar ai në Shqipëri. Unë i bëra një metaforë, se isha i pakënaqur me fondacionin, sepse mendoja se duhet të ishte më agresiv ndaj pushtetit, që në atë kohë ishte Berisha. I thashë se ka punuar si një fuqi gjysmë plotë, gjysmë bosh, por e rëndësishme është që të qëndrojë mbi ujë, të jetojë.
Më bëri përshtypje, se ai tha se i pëlqen kjo ideja e fuqisë, që të qëndrojë mbi ujë. Ngela pak i zhgënjyer. Ai më tha se pakënaqësitë që kisha unë, ja kishte shkruar Edi Rama me një letër në atë kohë. I kishte bërë Rama një letër kundër fondacionit në atë kohë.
E vërteta është se ai dinte pak, ose thuajse fare, për Shqipërinë. Tha se donte të takohej me ata që kishim për Shqipërinë, ose për Ballkanin, që të jepte disa detaje më shumë se si të bëheshin punët. Kjo ishte biseda e parë me të. Takimi i dytë ka qenë, kur ka ardhur në Tiranë. Ka qenë më shumë një takim kortezie, dhe nuk kam ndonjë kujtesë të veçantë për të. Ishte koha kur kishin ardhur socialistët në pushtet, ndoshta në vitet 2000”, tha Lubonja.
Ndërsa Artur Zheji tha për Fondacionin Soros se është e paimagjinueshme që Soros të ketë interesa në Shqipëri, pasi sipas tij është thjesht një pikë në oqean.
‘Një herë kam qëlluar, kur vija nga Roma në Shqipëri, në kohën kur qarkullonte lajmi se kishte ardhur Sorosi, por këta sorosianët shqiptarë e mbanin me agjendë të mbyllur takimin me të. Mbaj mend ka qenë z. Piro Misha, e disa të tjerë, që e shoqëronin. Unë nuk kam kontakte personale dje ishte shumë interesant rrëfimi i Lubonjës se këtu lidhet edhe epërsia që krijoi Rama në marrëdhënie të veçanta, me një figurë si Sorosi”, tha ai.
Ai gjithashtu theksoi se Shqipëria për entitetin Sorosian është një pikë në oqean, ndërsa theksoi se habitet për vëmendjen e tij ndaj vendit tonë.
‘Sorosi hyn me Shoqërinë e hapur dhe rreth tij u krijuan shumë sipërmarrje private që mbanin si buxhet paratë e fondacionit dhe duke lexuar edhe akuzat dhe betejën mes Putin dhe Soros, pothuajse e gjithë ekonomia e ish-bashkimit Sovjetik u dominua nga Sorosianët.
Sorosi u bë shumë i dashur në perëndim sepse ktheu drejt tregut perëndimor Rusinë dhe thuhet se ka qenë ndërmjetës për bllokimin e armëve të rrezikshme atomike që të mos binin në duar të gabuar. Një kolos kaq i madh që vjen në Shqipëri më duket një paradoks i madh dhe më duket qesharake që thuhet se angazhimi i tij është kaq i rëndësishëm. Që ai të ketë interes ekonomik në Shqipëri më duket fare e parëndësishme”, tha Zheji.
