Ish-zyrtarja e LSI dhe aktivistja Brisida Gjikondi ka komentuar protestën e dhunshme të 8 janarit teksa ka kërkuar arrestimin e ish-kryeministrit Sali Berisha. Gjikondi tha se Berisha është ai i cili ka shkërmoqur klasën politike duke pasuruar veten.
Ajo u shpreh se ish-kryeministri duhet të ishte arrestuar me çdo kusht pasi ishte organizatori kryesor që solli një shfaqje kriminale. Sipas saj qëllimet e tij janë vetëm për të destabilizuar dhe shkatërruar vendin. “Ai dhe ata, e qoftë ai “dallëndyshja” e parë e shkërmoqjes dhe vajtjes në djall të kësaj klase politike, vëllavrasëse, hipokrite, dhe grabitqare për shqiptarët.
Atyre dhe mafies së mediave dhe bizneseve që kanë trashur qafën bashkë me ta. Ai sot duhet të ishte arrestuar në kushtet e flagrancës, pa shumë stërhollime dhe gjoja procedura. Ai është nxitësi, organizuesi dhe sponsorizuesi kryesor i asaj shfaqjeje kriminale që u konsumua para gjithë botës!
Simbolika e tij sot në rast se nuk ndëshkohet është ogurzezë për gjithë Ballkanin, si precedent për çdo “non grata” tjetër që tek ai shikon shembullin e destabilitetit dhe shkatërrimit të vendit si korridor shpëtimi”, tha Gjikondi. Aktivistja u shpreh se Berisha ishte i pari që duhej arrestuar jo njerëzit e dëshpëruar me vare dhe çekiçë. Gjikondi tha se nëse Berisha nuk arrestohet rezukton se shteti është një fasadë hipokrizie.
Sipas saj, me arrestimin e ish-kryeministrit mund të vijë vërtet demokracia.“Këta si një grup i organizuar me kode edhe pse kanë ndërruar qeveritë dhe kanë zëvendësuar njëri tjetrin, djathtas e majtas kurrë nuk kanë proceduar penalisht dhe ligjërisht kundër njeri tjetrit, për asnjë krim, tender, grabitje dhe zullum që ka varfëruar këtë popull të vuajtur!
Sot ai duhet të ishte arrestuar, asnjë i dëshpëruar tjetër jo, pavarësisht varesë, çekiçit dhe hurit që mbante në dorë. Në rast se ai nuk arrestohet atëherë këtij shteti fasadë dhe hipokrit i ardhshim për të mirë. Ligjet dhe burgjet këtu janë për shqiptarin e thjeshtë, jo për atë dhe ata që janë autorët kryesorë të rrënimit dhe turpërimit tonë kombëtarë. Sot pamë një shfaqje të frikshme! Të arrestohet, dhe qoftë ai vërtet një herë të vetme lajmëtari se demokracia po vjen”, u shpreh ajo.
