Historiani Paskal Milo ka promovuar këtë fundjavë librin e tij më të ri “Shqiptarët në Luftën e Dytë Botërore, të pathënat dhe enigmat 1943-1944”, për të cilin u shpreh i bindur se mund të provokojë shumë debate, ku do të sulmohet dhe vlerësohet.
Duke folur në ceremoninë e promovimit të librit, profesor Milo theksoi se libri i tij, nxjerr të vërtetën që Enver Hoxha ishte i pari, që provokoi Ballin Kombëtar dhe që për rrjedhim ndezi konfliktin mes komunistëve dhe ballistëve. “Janë tre letra që Enver Hoxha i ka shkuar dhe i ka dërguar në 1 tetori 1943. Spikasin dy gjëra themelore.
E para thirrja që u bëhet komunistëve që të fillojnë të rezistojnë kundër gjermanëve që sapo kishin hyrë në Shqipëri. E dytë që të drejtonin luftën e tyre për asgjësimin e Ballit Kombëtar. Enver Hoxha ishte i pari që provokoi Ballin Kombëtar”, deklaroi profesor Milo për gazetarët.
Më tej gjatë fjalës së tij, historiani dhe politikani, Paskal Milo theksoi se ka ardhur koha që në Shqipëri të mos kemi opinione folklorike, por sipas tij, të kemi opinione dhe debate shkencore mbështetur në dokumente, në arkiva dhe bibliografi serioze.
“Unë nuk i jam trembur sfidave dhe kjo është një sfidë më vete. Ka ardhur koha që në Shqipëri të mos kemi opinione folklorike për historinë si shkencë, por të kemi opinione dhe debate shkencore mbështetur në dokumente, në arkiva dhe bibliografi serioze.
T’i japim fund këtij karuseli të tmerrshëm të debateve shterpe, ku ngatërrohet politika dhe nuk e le shkencën që të thotë fjalën e vet me kompetencë”, nënvizoi Milo.
Kujtojmë që disa nga temat më të debatueshme që trajtohen në vëllimin II të librit “Shqiptarët në Luftën e Dytë Botërore” janë: Hitleri dhe “Pavarësia” shqiptare; Hutimi i përkohshëm i Rezistencës; Kompromisi i Beratit ; Shansi i humbur i bashkimit; Ndarja pa kthim e FNÇ me Ballin Kombëtar; Lëvizja monarkiste e Legalitetit; Formimi i Partisë Socialdemokrate; Aleanca komuniste dhe antifashiste shqiptaro-jugosllave; Kosova në udhëkryqin e së ardhmes ; Marrëdhëniet antifashiste shqiptaro-greke; Golgota çame, etj.
