Ashtu siç gazeta e kishte paralajmëruar, kryeministri Edi Rama ka dëshmuar dje përpara komisionit hetimor të inceneratorëve.
Me dëshminë e kryeministrit Rama komisioni hetimor për inceneratorët mbylli dje maratonën e dëshmive për këtë çështje të cilën opozita e quan “afera 430 milionë eurosh”, të cilën Rama i’u a shkërmoqi dhe i nxorri publikisht përpara shqiptarëve si mashtrues të paturpshëm.
Ndërkohë që mbledhja që zgjati dje për më shumë se 10 orë nis qysh në fillim të saj me debate, teksa shefi i qeverisë u kujdes t’ua bënte të qartë anëtarëve të komisionit se vendimi i qeverisë që ai drejton për të ndërtuar 3 inceneratorë është një akt që duhet përshëndetur dhe për të cilin ndihet krenar.
“Këto projekte janë një nga krenaritë e mia si Kryeministër dhe kjo nuk ka pikë dyshimi, që unë iu dal për zot vendimeve të mia. Deri në 2013 ekzistonte vetëm një pikë grumbullimi e mirëmenaxhuar në Bushat dhe pastaj ishte Sharra, si një bombë ekologjike dhe 50% e popullatës shqiptare nuk kishte asnjë shërbim për asgjësimin e mbetjeve.
Sot falë investimeve që bëri qeveria ime në fushën e mbetjeve situata është komplet ndryshe”, deklaroi ai.
Rama: Shkëlzen Berisha në foto me trafikantë
Rama u pyet dhe për njohje me krerët e inceneratorëve ku mohoi. Por deputeti Belind Këlliçi e pyeti në lidhje me udhëtimin e Arben Ahmetajt me Mirel Mërtirin, Rama tha se duhet të hiqet dorë nga kjo mendësi me foto.
Ai përmendi disa foto që kanë qarkulluar ku djali i ish-kryeministrit Berisha shfaqet në shoqërinë e një grupi kriminal. “Unë nuk preferoj të udhëtoj me biznesmenë e të bëj asgjë tjetër me biznesmenë veç bisedave të lidhur ame çështje të interesit ët tyre privat dhe interesit publik që unë përfaqësoj. Duke pas parasysh rrethanat konkrete, duhet parë sepse nuk mendoj që lidhjet duhen bërë kaq direkt. Solla shembullin e fotos para disa ditësh.
Djali i ish-kryeministrit, ha e pi me një nga grupet mafioze më të egra të Europës. A është kjo arsye që unë të them që djali i sh-kryeministrit është mafioz dhe këta ndajnë kokainën bashkë? Është mirë mos ta zgjas më zinxhirin e asaj historie. Fotografitë nuk tregojnë asgjë.
Mos të inkriminojmë njerëzit me foto se je i ri e nuk dihet se çfarë foto të del ty nesër dhe po të doli unë do të të mbroj ty. Mua më kanë nxjerrë lakuriq, e di ti. Mua ish-partia jote më ka nxjerrë lakuriq”, tha Rama. më pas u bë i njëjti debat dhe Rama përmendi dhe një ish-ministër, që sipas verifikimeve të gazetës rezulton Flamur Noka.
“Jam gati, të mbarojmë njëherë këtë shpimin e ballonit 430 milionë euro. Me foto jepet informacion sepse përmenda djalin e ish-kryeministri dhe bashkë me të ishte edhe një ish-ministër i juaji i Brendshëm”, tha ai.
