Kryeministri Edi Rama ka sulmuar sërish protestuesit që prejt disa ditësh kanë dalë në sheshe kundër rritjes së çmimit të naftës, duke e konsideruar këtë lëvizje, si protestën më të turpshme që ka ndodhur.
Kreu i qeverisë u angazhua se përsa kohë të jetë ai në drejtimin e vendit, nuk do të ketë asnjë heqje të taksave të karburanteve.
“Na duhet të komunikojmë edhe sepse këtu tek ne si në asnjë vend tjetër të NATO dhe BE që po përjeton të njëjtat shenja shqetësuese me çmimet, të kemi të bëjmë me një gërdi turpi.
Po e përsëris këtë sa herë të më jepet mundësia. Që nga protesta e parë e fillimit të zgjimit të Shqipërisë pluraliste deri më sot ka pasur shumë protesta, edhe të dhunshme dhe nga ato që kanë degraduar, por protestë më të turpshme sesa kjo as nuk ka pasur dhe as nuk ka sesi të ketë dhe reagim më të turpshëm se ai ndaj kësaj proteste nuk mund të ketë.
Për çfarë protestohet? Kundër kujt protestojnë? Të gjitha vendet po e përjetojnë këtë krizë dhe po protestojnë kundër Rusisë, askush nuk proteston kundër qeverisë së vetë. Sa të jem unë këtu nuk ulet asnjë taksë nga karburantet”, u shpreh Rama.
Kryeministri Rama tha se jo aq sa kanë dalë sot në protestë, por edhe 300-fishi i tyre nuk do ta detyrojnë qeverinë as të ulë dhe as të heqë taksat.
“Mua nuk më shqetësojnë, jo aq por dhe 300 fish, taksat mbi karburantet sa të jem unë nuk hiqen nuk ulen nuk lëvizin.
Mua më alarmon diçka tjetër, cënimi i drejtpërdrejtë i dinjitetit tonë si komb si popull, si shtet, si vend si shoqëri, si shqiptarë nga ky reagim”, deklaroi Rama.
